Ambani&Adani | అంబానీ.. అదానీ కంటే జుక‌ర్‌బ‌ర్గ్ వెన‌క్కి.. ఎందుకంటే!

మెటా షేర్లు 26% ప‌త‌నం కావ‌డంతో ఫేస్‌బుక్ అధినేత జుక‌ర్‌బ‌ర్గ్‌ను ముకేశ్ అంబానీ, గౌతం అదానీ దాటేశారు.

Ambani&Adani |  ఇండియ‌న్ బిలియ‌నీర్ కార్పొరేట్లు ముకేశ్ అంబానీ, గౌతం అదానీ స‌రికొత్త మైలురాయిని దాటేశారు. కుబేరుల వ్య‌క్తిగ‌త సంప‌ద‌లో మెటా (ఫేస్‌బుక్‌) సీఈవో మార్క్ జుక‌ర్‌బ‌ర్గ్‌ను అధిగ‌మించారు. మెటా ప్లాట్‌ఫామ్స్ స్టాక్ ఒక్క‌రోజులో భారీగా ప‌త‌నం కావ‌డంతో ఫేస్‌బుక్ అధినేత జుక‌ర్‌బ‌ర్గ్ నిక‌ర సంప‌ద 29 బిలియ‌న్ల డాల‌ర్లు క‌రిగిపోయింది. దీంతో ఫోర్బ్స్ రియ‌ల్‌టైం బిలియ‌నీర్ల జాబితాలో జుక‌ర్‌బ‌ర్గ్ 12వ స్థానానికి ప‌డిపోయారు. ముకేశ్ అంబానీ, గౌతం అదానీ త‌ర్వాత ర్యాంక్‌లోకి ప‌త‌నం అయ్యారు.

మెటా షేర్లు 26 % డౌన్‌

అమెరికా సోష‌ల్ మీడియా దిగ్గజం మెటా స్టాక్ శుక్ర‌వారం 26 శాతం ప‌త‌నం కావ‌డంతో 200 బిలియ‌న్ల డాల‌ర్ల సంస్థ మార్కెట్ క్యాపిట‌లైజేష‌న్ హ‌రించుకుపోయింది. కంపెనీ చ‌రిత్రలో ఇంత భారీ మొత్తం ఎం-క్యాప్ న‌ష్ట‌పోవ‌డం ఇదే తొలిసారి. దీంతో ఫేస్‌బుక్ వ్య‌వ‌స్థాప‌కుడు, చీఫ్ ఎగ్జిక్యూటివ్ జుక‌ర్‌బ‌ర్గ్ వ్య‌క్తిగ‌త సంప‌ద 85 బిలియ‌న్ల డాల‌ర్ల‌కు దిగివ‌చ్చింది. ఫేస్‌బుక్‌గా పేరొందిన మెటాలో జుక‌ర్‌బ‌ర్గ్‌కు 12.8 శాతం వాటా ఉంది.

ఎల‌న్‌మ‌స్క్ త‌ర్వాత ఇదే గ‌రిష్ఠం

గ‌తేడాది న‌వంబ‌ర్‌లో టెస్లా సీఈవో ఎల‌న్‌మ‌స్క్ వ్య‌క్తిగ‌త సంప‌ద 35 బిలియ‌న్ల డాల‌ర్లు ప‌త‌న‌మైంది. టెస్లాలో త‌న వ్య‌క్తిగ‌త వాటా 10 శాతం అమ్మాలా అని ట్వీట్ చేశాక నెటిజ‌న్లు ట్రోల్ చేశారు. దీంతో ఆయ‌న వ్య‌క్తిగ‌త సంప‌ద న‌ష్ట‌పోయారు. నాటి నుంచి ఎల‌న్‌మ‌స్క్ ఇంకా కోలుకోలేదు. ఆ త‌ర్వాత అత్య‌ధికంగా ఒక్క‌రోజులో వ్య‌క్తిగ‌త సంప‌ద కోల్పోయిన కుబేరుడిగా జుక‌ర్‌బ‌ర్గ్ నిలుస్తారు. గతేడాది జుక‌ర్‌బ‌ర్గ్ 4.47 బిలియ‌న్ల డాల‌ర్ల విలువ గ‌ల వాటాలు విక్ర‌యించారు.

జెఫ్‌బెజోస్ ఇలా గెయిన్‌

మ‌రో బిలియ‌నీర్‌, అమెజాన్ అధినేత జెఫ్ బెజోస్ వ్య‌క్తిగ‌త సంప‌ద 20 బిలియ‌న్ల డాల‌ర్లు పెరిగింది. అమెజాన్ బ్లాక్ బ‌స్ట‌ర్ ఎర్నింగ్స్ సంపాదించ‌డంతో ఇది సాధ్య‌మైంది. అమెజాన్‌లో జెఫ్ బెజోస్ వాటా 9.9 శాతం. ప్ర‌పంచ కుబేరుల జాబితాలో జెఫ్ బెజోస్ మూడో ర్యాంక్‌లో ఉన్నారు.