న్యూయార్క్ : మెటా మరోసారి మాస్ లేఆఫ్స్కు (Mass Layoffs) తెగబడింది. మెటా భేటీలో కొలువుల కోతపై కంపెనీ గ్లోబల్ అఫైర్స్ ప్రెసిడెంట్ నిక్ క్లెగ్ ఉద్యోగులకు ఈ విషయం స్పష్టం చేసినట్టు సమాచారం. ఈ ఏడాది మేలో తదుపరి దశ లేఆఫ్స్ ఉంటాయని మెటా సీఈవో మార్క్ జుకర్బర్గ్ ఇటీవల ప్రకటించగా ఆ దిశగానే తాజా లేఆఫ్స్ను కంపెనీ తెరలేపింది. వచ్చే వారం నుంచి 6000 మంది ఉద్యోగులను మెటా తొలగిస్తుందని చెబుతున్నారు.
ఇక మెటా గత ఏడాది నవంబర్లో 11,000 మంది ఉద్యోగులను కంపెనీ తొలగించగా 10,000 మంది ఉద్యోగులపై వేటు వేయనున్నట్టు ఈ ఏడాది మార్చిలో ప్రకటించింది. ఫేస్బుక్ పేరెంట్ కంపెనీ మెటా ఇప్పటికే 4000 మంది ఉద్యోగులను తొలగించగా మరో 6,000 మంది ఉద్యోగులను త్వరలో సాగనంపనుంది. థర్డ్ వేవ్ లేఆఫ్స్ వచ్చే వారం నుంచే ప్రారంభమవుతాయని తెలిసింది. తన విభాగంతో పాటు అన్ని బిజినెస్ టీముల నుంచి ఉద్వాసన తప్పదని నిక్ క్లెగ్ చెప్పుకొచ్చారు.
తాజా లేఆఫ్స్ ఎప్పుడు ప్రారంభమవుతాయి, ఎవరెవరు లేఆఫ్స్తో ప్రభావితమవుతారనే వివరాలను సీనియర్లు త్వరలోనే ఉద్యోగులకు ఓ నోట్ పంపనున్నారు. ఆపై లేఆఫ్స్ బాధితులకు కంపెనీ ఈమెయిల్లో సమాచారం అందిస్తుందని తెలసింది. గతంలో మెటా తొలగించిన ఉద్యోగులకు కంపెనీ పరిహార ప్యాకేజ్ అందించగా తాజా లేఆఫ్స్లోనూ అదే పరిహార ప్యాకేజ్ను వర్తింపచేస్తారా అనే విషయంలో కంపెనీ వర్గాలు స్పష్టత ఇవ్వలేదు. ఆర్ధిక మందగమనం, ఆర్ధిక మాంద్యం భయాలు వెంటాడుతున్న క్రమంలో లేఆఫ్స్ను మెటా కొనసాగిస్తోందని చెబుతున్నారు.
Read More
Layoffs | 3000 మంది ఉద్యోగులను తొలగించిన క్లౌడ్ దిగ్గజం