Kinetic Luna | సింగిల్‌ ఛార్జింగ్‌తో 110 కి.మీ. నడిచే నయా లూనా.. రైతన్నలకు ఇదే బెస్ట్‌ ఛాయిస్‌!

Kinetic Luna | అప్పుడెప్పుడో 30-40 ఏండ్ల క్రితం మార్కెట్‌లో హల్‌చల్‌ చేసిన లూనా.. మళ్లీ కొత్త రూపులో ముందుకొచ్చింది. ‘ఈ-లూనా’ పేరుతో దీన్ని దేశీయ మార్కెట్‌కు బుధవారం కైనెటిక్‌ గ్రీన్‌ పరిచయం చేసింది.

Kinetic Luna | న్యూఢిల్లీ, ఫిబ్రవరి 7: అప్పుడెప్పుడో 30-40 ఏండ్ల క్రితం మార్కెట్‌లో హల్‌చల్‌ చేసిన లూనా.. మళ్లీ కొత్త రూపులో ముందుకొచ్చింది. ‘ఈ-లూనా’ పేరుతో దీన్ని దేశీయ మార్కెట్‌కు బుధవారం కైనెటిక్‌ గ్రీన్‌ పరిచయం చేసింది. ఈ విద్యుత్తు ఆధారిత (ఈవీ) ద్విచక్ర వాహనం.. రైతులు, చిరు వ్యాపారుల వినియోగానికి, వస్తూత్పత్తుల డెలివరీలకు వీలుగా ఉన్నది.

వెనుక సీటును వేరుచేసుకునే సదుపాయం ఉన్న ఈ టూవీలర్‌పై సిలిండర్లు, పెట్టెలు, ఇతరత్రా సామాగ్రిని సులువుగా తరలించవచ్చని కంపెనీ వర్గాలు చెప్తున్నాయి. ఇక ఢిల్లీ ఎక్స్‌షోరూం ప్రకారం దీని ధర రూ.69,990. మల్‌బెర్రీ రెడ్‌, ఓషియన్‌ బ్లూ, పియర్ల్‌ ఎల్లో, స్పార్క్‌లింగ్‌ గ్రీన్‌, నైట్‌ స్టార్‌ బ్లాక్‌ రంగుల్లో ఈ ఎలక్ట్రిక్‌ మోపెడ్‌ కస్టమర్లకు అందుబాటులో ఉంటుంది. ఒకినావా డ్యూయల్‌ 100, టీవీఎస్‌ ఎక్స్‌ఎల్‌ 100 తదితర మాడళ్లకు పోటీనివ్వగలదని మార్కెట్‌ వర్గాలు అంచనా వేస్తున్నాయి.

ప్రత్యేకతలు

• 2కిలోవాట్‌ సామర్థ్యం కలిగిన బ్యాటరీ.
• మార్పిడి సౌకర్యం.
• యూఎస్‌బీ చార్జింగ్‌ పోర్ట్‌.
• 4 గంటల్లో పూర్తిగా చార్జింగ్‌.
• ఒక్కసారి చార్జింగ్‌ చేస్తే 110 కిలోమీటర్లు ప్రయాణించవచ్చు.
• 1.2కిలోవాట్‌ మిడ్‌- మౌంటెడ్‌ మోటర్‌.
• గరిష్ఠ వేగం గంటకు 50 కిలోమీటర్లు.
• టెలిస్కోపిక్‌ ఫోర్క్‌, డ్యూయల్‌ షాక్‌ అబ్జర్బర్లు.
• 150 కిలోల వరకు బరువును మోయగలదు.
• సరకు రవాణా కోసం బ్యాగ్‌ హుక్స్‌.