భారత్ విదేశీ మారక ద్రవ్యం (ఫారెక్స్) నిల్వలు మరింత పెరిగాయి. ఈ నెల ఒకటో తేదీతో ముగిసిన వారానికి ఫారెక్స్ నిల్వలు 6.55 బిలియన్ డాలర్లు పెరిగి 625.63 బిలియన్ల డాలర్లకు చేరాయని ఆర్బీఐ శుక్రవారం ఓ ప్రకటనలో తెలిపింది. ఫిబ్రవరి 23తో ముగిసిన వారానికి ఫారెక్స్ నిల్వలు 2.98 బిలియన్ డాలర్లు పుంజుకుని 619.07 బిలియన్ డాలర్లకు చేరాయి.
ఈ నెల ఒకటో తేదీతో ముగిసిన వారంలో విదేశీ కరెన్సీ అసెట్స్ (ఎఫ్సీఏ) 6.04 బిలియన్ డాలర్లు పెరిగి 554.23 బిలియన్ డాలర్లకు చేరాయి. డాలర్ ఇండెక్స్ లో అమెరికా డాలర్ యేతర కరెన్సీల విలువ పెరుగుదల, తగ్గుదల ఆధారంగా డాలర్ ఇండెక్స్ ఖరారవుతుంది. గోల్డ్ రిజర్వు నిల్వలు 569 మిలియన్ డాలర్లు పెరిగి 48.42 బిలియన్ డాలర్లకు చేరుకోగా, 17 మిలియన్ డాలర్ల పతనంతో ఎస్డీఆర్లు 18.18 బిలియన్ డాలర్లకు పడిపోయాయి. అలాగే అంతర్జాతీయ ద్రవ్యనిధి సంస్థ (ఐఎంఎఫ్)లో ఫారెక్స్ నిల్వలు 41 మిలియన్ డాలర్లు తగ్గి 4.8 బిలియన్ డాలర్లకు పతనమయ్యాయి.
2021 అక్టోబర్లో ఫారెక్స్ నిల్వలు ఆల్ టైం గరిష్ట స్థాయి 645 బిలియన్ డాలర్లకు పెరిగింది. తర్వాతీ కాలంలో అంతర్జాతీయంగా భౌగోళిక ఒత్తిళ్లతో ఆర్బీఐలో ఫారెక్స్ నిల్వలు పడిపోయాయి. రూపాయి విలువ పడిపోకుండా నివారించేందుకు ఆర్బీఐ బహిరంగ మార్కెట్లో డాలర్లను విక్రయిస్తుంది.