2 బిలియన్‌ డాలర్లు తరిగిపోయిన ఫారెక్స్‌

రికార్డు స్థాయికి చేరుకున్న విదేశీ మారకం నిల్వలు తరిగిపోయాయి. గత కొన్ని వారాలుగా పెరుగుతూ వచ్చిన ఫారెక్స్‌ రిజర్వులు ఈ నెల 24తో ముగిసిన వారాంతానికిగాను 2.027 బిలియన్‌ డాలర్లు కరిగిపోయి 646.673 బిలియన్‌ డాలర్లకు చేరుకున్నాయి. ఈ విషయాన్ని రిజర్వు బ్యాంక్‌ తాజాగా విడుదల చేసిన నివేదికలో వెల్లడించింది.

ముంబై, మే 31: రికార్డు స్థాయికి చేరుకున్న విదేశీ మారకం నిల్వలు తరిగిపోయాయి. గత కొన్ని వారాలుగా పెరుగుతూ వచ్చిన ఫారెక్స్‌ రిజర్వులు ఈ నెల 24తో ముగిసిన వారాంతానికిగాను 2.027 బిలియన్‌ డాలర్లు కరిగిపోయి 646.673 బిలియన్‌ డాలర్లకు చేరుకున్నాయి. ఈ విషయాన్ని రిజర్వు బ్యాంక్‌ తాజాగా విడుదల చేసిన నివేదికలో వెల్లడించింది. అంతక్రితం వారంలో 4.549 బిలియన్‌ డాలర్లు పెరిగి రికార్డు స్థాయి 648.7 బిలియన్‌ డాలర్లకు చేరుకున్న విషయం తెలిసిందే.

విదేశీ కరెన్సీ రూపంలో ఉన్న ఆస్తుల విలువ పడిపోవడం వల్లనే రిజర్వులు తరిగాయని పేర్కొంది. గతవారంలో వీటి విలువ 1.51 బిలియన్‌ డాలర్లు తగ్గి 567.499 బిలియన్‌ డాలర్లకు తరిగాయి. యూరో, పౌండ్‌, యెన్‌ కరెన్సీలు తీవ్ర ఒడిదుడుకులకు లోనుకావడంతో విదేశీ కరెన్సీ రూపంలో ఉన్న ఆస్తుల విలువలపై పడింది. అలాగే పసిడి రిజర్వులు 482 మిలియన్‌ డాలర్లు తగ్గి 56.713 బిలియన్‌ డాలర్లకు పడిపోగా, ప్రత్యేక డ్రాయింగ్‌ రైట్స్‌(ఎస్‌డీఆర్‌ఎస్‌) కింద రిజర్వులు 33 మిలియన్‌ డాలర్లు తగ్గి 18.135 బిలియన్‌ డాలర్లకు పరిమితమయ్యాయి.