Hyderabad | హైదరాబాద్‌లో అంతకంతకూ పెరుగుతున్న ఇండ్ల ధరలు

దరాబాద్‌లో ఇండ్ల ధరలు అంతకంతకూ పెరుగుతూపోతున్నాయి. రాష్ట్రంలో ఆర్థిక పరిస్థితులు, ఉద్యోగ-ఉపాధి అవకాశాలు, వ్యాపారాలు-పరిశ్రమల నిర్వహణ మెరుగ్గా ఉండటంతో అంతా ఇక్కడ స్థిర నివాసానికి ఆసక్తి కనబరుస్తున్నారు.

• ఈ ఏప్రిల్‌-జూన్‌లో 6.9 శాతం పెరిగిన ధరలు
• వెల్లడించిన నేషనల్‌ హౌజింగ్‌ బ్యాంక్‌
• దేశంలోని 50 నగరాలపై నివేదిక
• నానాటికీ ఆకర్షణీయంగా నగర రియల్టీ

న్యూఢిల్లీ, ఆగస్టు 30: హైదరాబాద్‌లో ఇండ్ల ధరలు అంతకంతకూ పెరుగుతూపోతున్నాయి. రాష్ట్రంలో ఆర్థిక పరిస్థితులు, ఉద్యోగ-ఉపాధి అవకాశాలు, వ్యాపారాలు-పరిశ్రమల నిర్వహణ మెరుగ్గా ఉండటంతో అంతా ఇక్కడ స్థిర నివాసానికి ఆసక్తి కనబరుస్తున్నారు. ఈ క్రమంలోనే నివాస గృహాల ధరలు పరుగులు పెడుతున్నాయి. నేషనల్‌ హౌజింగ్‌ బ్యాంక్‌ (ఎన్‌హెచ్‌బీ) తాజా నివేదిక ఇందుకు అద్దం పడుతున్నది. ప్రస్తుత ఆర్థిక సంవత్సరం (2023-24) తొలి త్రైమాసికానికి (ఏప్రిల్‌-జూన్‌)గాను హైదరాబాద్‌సహా దేశంలోని 50 నగరాల్లో ఇండ్ల ధరలపై ఎన్‌హెచ్‌బీ నివేదిక రూపొందించింది. హౌజింగ్‌ ప్రైస్‌ ఇండెక్స్‌ (హెచ్‌పీఐ) పేరుతో ఆ వివరాలను విడుదల చేసింది. దీంతో గత ఆర్థిక సంవత్సరం (2022-23) ఏప్రిల్‌-జూన్‌ త్రైమాసికంతో పోల్చితే హైదరాబాద్‌లో ఇండ్ల ధరలు 6.9 శాతం ఎగబాకినట్టు తేలింది.

7 నగరాల్లో..
దేశవ్యాప్తంగా 50 నగరాల్లోని ఇండ్ల ధరలను హౌజింగ్‌ ఫైనాన్స్‌ కంపెనీల రెగ్యులేటర్‌ ఎన్‌హెచ్‌బీ ఆరా తీసింది. దీంతో 43 నగరాల్లో గతంతో పోల్చితే ఈ ఏప్రిల్‌-జూన్‌లో పెరిగాయని, 7 నగరాల్లో మాత్రం తగ్గాయని స్పష్టమైంది. బ్యాంకులు, హౌజింగ్‌ ఫైనాన్స్‌ కంపెనీల నుంచి సేకరించిన ప్రాపర్టీ ధరలు, వాటి విలువల ఆధారంగా ఈ రిపోర్టును ఎన్‌హెచ్‌బీ తయారు చేసింది. అయితే వడ్డీరేట్లు పెరిగినా గృహ రుణాలు ఇంకా అందరికీ అందుబాటులోనే ఉంటుండటం మార్కెట్‌కు కలిసొస్తున్నదని ఈ సందర్భంగా ఎన్‌హెచ్‌బీ అభిప్రాయపడింది.

రికార్డు ధరల్లో భూములు
జీహెచ్‌ఎంసీ పరిధిలో హెచ్‌ఎండీఏ నిర్వహిస్తున్న భూముల వే లంలో ధరలు ఏ స్థాయి లో పలుకుతున్నాయో చూస్తూనే ఉన్నాం. మునుపెన్నడూ లేనివిధంగా రికార్డు స్థాయిలో ఎకరం గరిష్ఠంగా 100 కోట్లకు అమ్ముడవడం తెలిసిందే. ఈ నేపథ్యంలో ఇక్కడ చేపట్టే నిర్మాణాల ధరలకు ఆకాశమే హద్దవుతున్నది. ఈ స్థాయిలో డిమాండ్‌ ఉండటానికి కారణం.. రాష్ట్ర ప్రభు త్వ సుస్థిర పాలన, తీసుకుంటున్న నిర్ణయాలు, కల్పిస్తున్న మౌలిక సదుపాయాలు, అందిస్తున్న ప్రోత్సాహకాలు, కీలక రంగాల్లో అభివృద్ధి, వస్తున్న ఉద్యోగాలు, పెరుగుతున్న ఆదాయ వనరులేనని రియల్‌ ఎస్టేట్‌ రంగ నిపుణులు చెప్తున్నారు.

దేశంలోని 8 ప్రధాన నగరాల్లో.. నగరం ఇండ్ల ధరల్లో

వృద్ధి                        (శాతంలో)
అహ్మదాబాద్‌          9.1
బెంగళూరు            8.9
కోల్‌కతా                  7.8
హైదరాబాద్‌         6.9
పుణె                       6.1
ముంబై                2.9
చెన్నై                   1.1
ఢిల్లీ                     0.8