Belated ITR | మీరు వేతన జీవులా.. గత ఆర్థిక సంవత్సరం (2022-23) ఐటీ రిటర్న్స్ ఇంకా దాఖలు చేయలేదా.. ఇప్పటికీ ఐటీఆర్ దాఖలు చేయడానికి మరో అవకాశం కల్పిస్తోంది ఆదాయం పన్ను విభాగం. ఈ నెలాఖరులోగా ‘బీ లేటెడ్ ఐటీఆర్’ సమర్పించవచ్చునని తెలిపింది. 2022-23 ఆర్థిక సంవత్సరం ఐటీ రిటర్న్స్ దాఖలు చేయడానికి గత జూలై 31 తుది గడువు. ఆ గడువు ముగిసిన తర్వాత బీ లేటెడ్ ఐటీఆర్ ఫైల్ చేయొచ్చు. కానీ ఇప్పటికీ ఐటీఆర్స్ ఫైల్ చేయని వారు గణనీయ సంఖ్యలోనే ఉన్నారని ఆదాయం పన్ను విభాగం తెలిపింది. కనుక వారంటా ఈ నెల 31 లోపు బీలేటెడ్ ఐటీఆర్ ఫైలింగ్ పూర్తి చేయాలని హితవు చెప్పింది.
జూలై 31 లోపు ఐటీఆర్ దాఖలు చేసిన వారు.. తమ ఐటీఆర్ ఫైలింగ్లో ఏమైనా తప్పులు దొర్లినా ‘బీలేటెడ్ ఐటీఆర్’ ఫైల్ చేయొచ్చు. తప్పులు సరిదిద్దుకోకుంటే భవిష్యత్లో వారికి ఐటీ విభాగం నోటీసు జారీ చేసే అవకాశాలు ఉంటాయి. రివైజ్డ్ రిటర్న్స్ దాఖలు చేయడానికి ఎటువంటి ఆలస్య ఫీజు పే చేయనవసరం లేదు.
బీలేటెడ్ ఐటీఆర్ దాఖలు చేసే వారు మాత్రం సాధారణ రిటర్న్స్ ఫైల్ చేయాలి. సంబంధిత ఆర్థిక సంవత్సరంలో కేంద్ర ప్రత్యక్ష పన్నుల బోర్డు (సీబీడీటీ) నోటిఫై చేసిన ఫామ్తోనే ఐటీ రిటర్న్స్ సమర్పించాల్సి ఉంటుంది. అయితే బీలేటెడ్ ఐటీఆర్ ఫైల్ చేస్తున్న వారు తమ ఆదాయం రూ.5 లక్షల్లోపు ఉంటే రూ.1000 పెనాల్టీ.. అంత కంటే ఎక్కువ ఆదాయం గల వారు రూ.5000 వరకు పెనాల్టీ పే చేయాల్సి ఉంటుంది. ఆదాయం పన్ను చెల్లింపు పెండింగ్ లో ఉంటే.. అంత మొత్తంపై ఒకశాతం వడ్డీ కూడా చెల్లించాలి. అయితే, బీలేటెడ్ ఐటీఆర్ ఫైల్ చేసిన వారు తర్వాత 30 రోజుల్లో దాన్ని వెరిఫై చేసుకోవడం మరిచిపోవద్దని ఆదాయం పన్ను విభాగం హితవు చెప్పింది.