ట్విట్ట‌ర్ ఇండియా ఎండీపై కేసు.. ఘ‌జియాబాద్ పోలీసుల‌కు అక్షింత‌లు..!

ట్విట్ట‌ర్ ఇండియా ఎండీపై కేసు.. ఘ‌జియాబాద్ పోలీసుల‌కు అక్షింత‌లు..!| ఉత్త‌ర‌ప్ర‌దేశ్‌లోని ఘ‌జియాబాద్‌లో వీడియో వైర‌ల్ కేసులో ఆ రాష్ట్ర పోలీసుల‌కు ....

July 6, 2021 / 10:48 PM IST

బెంగ‌ళూరు: వివాదాస్ప‌ద వీడియో వైర‌ల్ అయిన కేసు ద‌ర్యాప్తుపై ఘ‌జియాబాద్ పోలీసుల‌కు ఆస‌క్తి లేద‌ని క‌ర్ణాట‌క హైకోర్టు వ్యాఖ్యానించింది. ట్విట్ట‌ర్ ప్లాట్‌ఫామ్‌పై వివాదాస్ప‌ద వీడియోను ఒక వ్య‌క్తి పోస్ట్ చేసిన అంశంపై ట్విట్ట‌ర్ ఇండియా ఎండీ మ‌నీశ్ మ‌హేశ్వ‌రికి వ్య‌తిరేకంగా ఘ‌జియాబాద్ పోలీసులు కేసు న‌మోదు చేసిన సంగ‌తి తెలిసిందే. ఈ కేసును ద‌ర్యాప్తు చేయాల‌ని ఘ‌జియాబాద్ పోలీసులు కోరు కోవ‌డం లేద‌ని మంగ‌ళ‌వారం జ‌రిగిన విచార‌ణ‌లో జ‌స్టిస్ జీ న‌రేందర్ వ్యాఖ్యానించారు.

జై శ్రీరాం.. వందే మాత‌రం అని నినాదాలు చేయ‌ని ఒక సీనియ‌ర్ సిటిజ‌న్ గ‌డ్డం క‌త్తిరించిన ద్రుశ్యాల‌తో కూడిన వీడియోను ఒక వ్య‌క్తి అప్‌లోడ్ చేశాడు. ట్విట్ట‌ర్‌లో ఈ వీడియో అప్‌లోడింగ్‌కు, ట్విట్ట‌ర్ ఇండియా ఎండీ మ‌నీశ్ మ‌హేశ్వ‌రికి సంబంధం ఏమిట‌ని జ‌స్టిస్ న‌రేంద‌ర్ ప్ర‌శ్నించారు. దీనికి ప్రాతిప‌దిక ఏమిట‌ని నిల‌దీశారు.

ట్విట్ట‌ర్ ఇండియా, ట్విట్ట‌ర్ ఇంక్ వేర్వేర‌ని న్యాయ‌మూర్తి గుర్తు చేశారు. ట్విట్ట‌ర్ ఇండియా మ‌ధ్య‌వ‌ర్తిత్వ సంస్థ కూడా కాద‌ని పేర్కొన్నారు. ట్విట్ట‌ర్ ఇండియా, ట్విట్ట‌ర్ ఇంక్ వేర్వేరైన‌ప్పుడు ద‌ర్యాప్తు ఎక్క‌డ జ‌రుగుతున్న‌ద‌ని ప్ర‌శ్నించారు. పోలీసులు రిజిస్టార్ ఆఫ్ కంపెనీస్ (ఆర్వోసీ)ని సంద‌ర్శించారా? అని నిల‌దీశారు.

కేసు ద‌ర్యాప్తును క‌ల‌గాపుల‌గం చేయొద్ద‌ని ఘ‌జియాబాద్ పోలీసుల‌కు హైకోర్టు సూచించింది. ఒక వ్య‌క్తి అప్‌లోడ్ చేసే వీడియోపై ట్విట్ట‌ర్ ఇండియా ఎండీ త‌న‌కు నియంత్ర‌ణ ఉండ‌ద‌ని చెబుతున్నార‌ని గుర్తు చేసింది. కొన్ని ల‌క్ష్యాల‌ను సాధించ‌డం కోసం భ‌య‌పెట్ట‌డం త‌ప్ప మ‌రొక‌టి కాద‌ని స్ప‌ష్టం చేసింది.

ఈ కేసు విష‌య‌మై ట్విట్ట‌ర్ ఇండియా ఎండీ మ‌నీశ్ మ‌హేశ్వ‌రిని ప్ర‌శ్నించాలంటే వీడియో కాన్ఫ‌రెన్స్ ద్వారా చేయొచ్చున‌ని తెలిపింది. ఈ కేసు త‌దుప‌రి విచార‌ణ‌ను బుధ‌వారానికి వాయిదా వేసింది.