D-Mart | డీ-మార్ట్ తొలి త్రైమాసికం ఫ‌లితాల్లో 17.5 శాతం గ్రోత్‌.. కొత్త‌గా ఆరు స్టోర్ల ప్రారంభం..!

D-Mart | డీ-మార్ట్ పేరుతో కార్య‌క‌లాపాలు నిర్వ‌హిస్తున్న రిటైల్ చైన్ ఎవెన్యూ సూప‌ర్ మార్ట్స్ ప్ర‌స్తుత ఆర్థిక సంవ‌త్స‌రం (2024-25) తొలి త్రైమాసికం ఆర్థిక ఫ‌లితాల్లో 17.45 శాతం వృద్ధి సాధించింది.

D-Mart | డీ-మార్ట్ పేరుతో కార్య‌క‌లాపాలు నిర్వ‌హిస్తున్న రిటైల్ చైన్ ఎవెన్యూ సూప‌ర్ మార్ట్స్ ప్ర‌స్తుత ఆర్థిక సంవ‌త్స‌రం (2024-25) తొలి త్రైమాసికం ఆర్థిక ఫ‌లితాల్లో 17.45 శాతం వృద్ధి సాధించింది. జ‌న‌ర‌ల్ మ‌ర్చండైజ్‌, అపారెల్స్ సేల్స్ పుంజుకోవ‌డంతో ఏప్రిల్‌-జూన్ త్రైమాసికంలో డీ-మార్ట్ రూ.773.68 కోట్ల నిక‌ర లాభం గ‌డించిన‌ట్లు ఎక్స్చేంజ్ ఫైలింగ్‌లో తెలిపింది. 2023-24 ఆర్థిక సంవ‌త్స‌రం ఏప్రిల్-జూన్ త్రైమాసికంలో రూ.658.71 కోట్ల నిక‌ర లాభం సంపాదించింది.

ప్ర‌స్తుత ఆర్థిక సంవ‌త్స‌రం జూన్ త్రైమాసికంలో డీ-మార్ట్ ఆప‌రేష‌న్ల ద్వారా 18.57 శాతం ఆదాయం పెంచుకున్న‌ది. 2023-24 ఆర్థిక సంవ‌త్స‌రం తొలి త్రైమాసికంలో రూ.11,865.44 కోట్ల ఆదాయం సంపాదించిన డీ-మార్ట్‌.. ఈ ఏడాది రూ.14,069.14 కోట్లు స‌ముపార్జించింది. అలాగే గ‌తేడాది జూన్ త్రైమాసికంతో పోలిస్తే ఈ ఏడాది తొలి త్రైమాసికంలో డీ-మార్ట్ మొత్తం ఖ‌ర్చులు 18.62 శాతం పెంచుకుని రూ.13,056.61 కోట్ల‌కు చేరాయి. జూన్ త్రైమాసికంలో ఎవెన్యూ సూప‌ర్‌మార్ట్ మొత్తం ఆదాయం 18.54 శాతం పుంజుకుని రూ.14,110.74 కోట్ల‌కు చేరింది.

జ‌న‌ర‌ల్ మ‌ర్చండైజ్‌, అపారెల్ సేల్స్ మెరుగు ప‌డ‌టంతో స్థూల లాభాలు గ‌డించిన‌ట్లు ఎవెన్యూ సూపర్ మార్ట్స్ సీఈఓ అండ్ మేనేజింగ్ డైరెక్ట‌ర్ నెవిల్లె నొరోన్హా చెప్పారు. జూన్ 30 తేదీ నాటికి కొత్త‌గా ఆరు స్టోర్ల‌ను ప్రారంభించింది డీ-మార్ట్‌. దీంతో దేశ‌వ్యాప్తంగా మొత్తం సంస్థ స్టోర్ల సంఖ్య 371కి చేరుకున్న‌ది. మ‌హారాష్ట్ర‌, గుజ‌రాత్‌, తెలంగాణ‌, ఆంధ్ర‌ప్ర‌దేశ్‌, క‌ర్ణాట‌క‌, త‌మిళ‌నాడు, మ‌ధ్య‌ప్ర‌దేశ్‌, రాజ‌స్థాన్‌, పంజాబ్‌, ఢిల్లీ-ఎన్సీఆర్ ప‌రిధిలో డీ-మార్ట్ రిటైల్ బిజినెస్ నిర్వ‌హిస్తోంది.