బీవోబీ యాప్‌పై ఆర్బీఐ ఆంక్షలు

ప్రభుత్వ రంగ బ్యాంక్‌ ఆఫ్‌ బరోడా మొబైల్‌ యాప్‌ ‘బీవోబీ వరల్డ్‌'లోకి కొత్త కస్టమర్లను చేర్చుకోరాదంటూ రిజర్వ్‌బ్యాంక్‌ నియంత్రణ విధించింది.

• కొత్త కస్టమర్లను చేర్చుకోరాదంటూ ఆదేశం

న్యూఢిల్లీ, అక్టోబర్‌ 10: ప్రభుత్వ రంగ బ్యాంక్‌ ఆఫ్‌ బరోడా మొబైల్‌ యాప్‌ ‘బీవోబీ వరల్డ్‌’లోకి కొత్త కస్టమర్లను చేర్చుకోరాదంటూ రిజర్వ్‌బ్యాంక్‌ నియంత్రణ విధించింది. పర్యవేక్షణా ఆందోళనల ఉన్నందున ఈ యాప్‌ విధించిన ఆంక్షలు తక్షణమే అమల్లోకి వస్తాయని మంగళవారం ఆర్బీఐ ఒక ప్రకటనలో తెలిపింది. ఈ అప్లికేషన్‌లో ఖాతాదారుల్ని చేర్చుకునేతీరులో కొన్ని పర్యవేక్షణా లోపాల్ని కనుగొన్నట్లు వెల్లడించింది. ఆర్బీఐ సంతృప్తిమేరకు బ్యాంక్‌ ఈ లోపాల్ని సరిచేసి, ప్రక్రియను పటిష్ఠపర్చడానికి లోబడి తదుపరి కస్టమర్లను చేర్చుకోవడాన్ని అనుమతిస్తామని వివరించింది. తాజా సస్పెన్షన్‌ కారణంగా ‘బీవోబీ వరల్డ్‌’ ప్రస్తుత కస్టమర్లకు ఎటువంటి అంతరాయం ఉండబోదని ఆర్బీఐ తెలిపింది.

దిద్దుబాటు చర్యలు చేపట్టాం: బీవోబీ

రిజర్వ్‌బ్యాంక్‌ లేవనెత్తిన ఆందోళనల పరిష్కారానికి ఇప్పటికే తాము దిద్దుబాటు చర్యలు చేపట్టామని, మిగిలిన వ్యత్యాల్ని పూడ్చేందుకు మరిన్ని చర్యలు మొదలుపెట్టామని బ్యాంక్‌ ఆఫ్‌ బరోడా తెలిపింది. కేంద్ర బ్యాంక్‌ సంతృప్తిమేరకు ఆర్బీఐ అధికారులతో కలిసి పనిచేస్తున్నట్టు స్టాక్‌ ఎక్సేంజీలకు సమర్పించిన ఫైలింగ్‌లో బీవోబీ పేర్కొంది. తమ కస్టమర్లకు ఎటువంటి అడ్డంకి ఏర్పడదని, మొబైల్‌ యాప్‌పై నిరంతర సేవల్ని అందుకోవచ్చని బ్యాంక్‌ హామీ ఇచ్చింది. ఆర్బీఐ తాజా ఉత్తర్వులతో తమ ప్రస్తుత కస్టమర్లు, కొత్త ఖాతాదారులకు తమ ఇతర డిజిటల్‌ బ్యాంకింగ్‌ ఛానళ్లయిన నెట్‌బ్యాంకింగ్‌, వాట్సాప్‌ బ్యాంకింగ్‌, డెబిట్‌ కార్డ్స్‌, ఏటీఎం తదితరాలు యథాతథంగా కొనసాగుతాయని వివరించింది. అలాగే తమ మొత్తం వ్యాపార, వృద్ధి ప్రణాళికలపై ఆర్బీఐ చర్యల ప్రభావం ఉండబోదని తెలిపింది.