చార్జీలు పెంచిన టెల్కోలు

మొబైల్‌ సబ్‌స్ర్కైబర్లకు టెలికం సంస్థలు వరుసగా షాకిస్తున్నాయి. ఇప్పటికే టెలికం దిగ్గజం రిలయన్స్‌ జియో తమ టారిఫ్‌ చార్జీలను పెంచగా.. తాజాగా ఇదే జాబితాలోకి భారతీ ఎయిర్‌టెల్‌, వొడాఫోన్‌ ఐడియాలు కూడా చేరాయి.

• 21 శాతం వరకు సవరించిన ఎయిర్‌టెల్‌
• వొడాఫోన్‌ ఐడియా 24 శాతం వరకు పెంపు

న్యూఢిల్లీ, జూన్‌ 28: మొబైల్‌ సబ్‌స్ర్కైబర్లకు టెలికం సంస్థలు వరుసగా షాకిస్తున్నాయి. ఇప్పటికే టెలికం దిగ్గజం రిలయన్స్‌ జియో తమ టారిఫ్‌ చార్జీలను పెంచగా.. తాజాగా ఇదే జాబితాలోకి భారతీ ఎయిర్‌టెల్‌, వొడాఫోన్‌ ఐడియాలు కూడా చేరాయి. ఈ రెండు సంస్థలు కూడా తమ ప్లాన్ల ధరలను కూడా పెంచుతున్నట్లు శుక్రవారం ప్రకటించాయి. ఎయిర్‌టెల్‌ చార్జీలు వచ్చే నెల 3 నుంచి అమలులోకి రానుండగా, అదే వొడాఫోన్‌ ఐడియా చార్జీలు మాత్రం జూలై 4 నుంచి అమలులోకి రానున్నాయి.

ఎయిర్‌టెల్‌ చార్జీలు వివరంగా..

• వచ్చే నెల 3 నుంచి అమలులోకి వచ్చేలా అన్ని రకాల ప్లాన్ల ధరలను 10-21 శాతం వరకు సవరించింది.
• రోజువారి డాటా 1జీబీపై చార్జీని రూ.3 పెంచింది. దీంతో ధర రూ.19 నుంచి రూ.22కి చేరుకున్నది.
• 365 రోజుల కాలపరిమితితో రోజుకు 2జీబీ డాటా ప్లాన్‌ను రూ.600 పెంచిం ది. దీంతో ఈ ప్లాన్‌ ధర రూ.2,999 నుంచి రూ.3,599కి చేరుకున్నది.
• అన్‌లిమిటెడ్‌ వాయిస్‌ ప్లాన్‌ టారిఫ్‌లను 11 శాతం వరకు పెంచింది. దీంతో 28 రోజుల కాలపరిమితితో 2జీబీ డాటా ప్లాన్‌ చార్జీని రూ.179 నుంచి రూ.199కి సవరించింది.
• 56 రోజుల కాలపరిమితితో రోజుకు 1.5 జీబీ డాటా ప్లాన్‌ను రూ.479 నుంచి రూ.579కి పెంచింది.
• అలాగే 28 రోజుల కాలపరిమితితో రోజుకు ఒక్క జీబీ డాటా ప్లాన్‌ చార్జీని రూ.265 నుంచి రూ.299కి, 1.5 జీబీ డాటా ప్లాన్‌ని రూ.299 నుంచి రూ. 349కి పెంచింది.
• 84 రోజుల వ్యాలిడిటీ ప్లాన్‌ను రూ.140 పెంచింది. రోజుకు 1.5 జీబీ డాటా ప్లాన్‌ చార్జీ రూ.719 నుంచి రూ.859కి, రోజుకు 2 జీబీ డాటా ప్లాన్‌ రూ.839 నుంచి రూ.979కి చేరుకున్నాయి.
• అలాగే పోస్ట్‌ పెయిడ్‌ రేట్లను కూడా 10-20 శాతం వరకు వడ్డించింది.

వొడాఫోన్‌ ఐడియా కూడా..

నష్టాల్లో నడుస్తున్న వొడాఫోన్‌ ఐడియా కూడా టారిఫ్‌ చార్జీలను పెంచుతున్నట్లు ప్రకటించింది. వచ్చే నెల 4 నుంచి అమలులోకి వచ్చేలా చార్జీలను 11 శాతం నుంచి 24 శాతం వరకు సవరించింది. ఎంట్రీ-లెవల్‌ ప్లాన్‌ కనీస చార్జీని 11 శాతం పెంచడంతో ఈ ప్లాన్‌ ధర రూ.179 నుంచి రూ.199కి చేరుకున్నది. అలాగే ప్రజాదరణ పొందిన 84 రోజుల కాలపరిమితి ప్లాన్‌ని రూ.719 నుంచి రూ.859కి పెంచింది. మరోవైపు రూ.2,899 వార్షిక ప్లాన్‌ చార్జీని 21 శాతం పెంచడంతో రూ.3,499కి చేరుకున్నది.