Minister Sridhar Babu | వెమ్‌ టెక్నాలజీస్‌ 1,000 కోట్ల పెట్టుబడి: మంత్రి శ్రీధర్‌ బాబు

రక్షణ రంగ పరికరాల తయారీ సంస్థ వెమ్‌ టెక్నాలజీస్‌ మొదటి దశ ప్రాజెక్టులో భాగంగా రూ.1,000 కోట్ల వరకు పెట్టుబడులు పెట్టబోతున్నదని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌ బాబు వెల్లడించారు.

Minister Sridhar Babu |  హైదరాబాద్‌, జూలై 25 (నమస్తే తెలంగాణ): రక్షణ రంగ పరికరాల తయారీ సంస్థ వెమ్‌ టెక్నాలజీస్‌ మొదటి దశ ప్రాజెక్టులో భాగంగా రూ.1,000 కోట్ల వరకు పెట్టుబడులు పెట్టబోతున్నదని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌ బాబు వెల్లడించారు. జహీరాబాద్‌ నిమ్జ్‌లో 511 ఎకరాల స్థలంలో ఏర్పాటవుతున్న ఈ సమీకృత ఉత్పాదన కేంద్రం వచ్చే ఏడాది డిసెంబర్‌ నాటికి అందుబాటులోకి రానున్నది.

కంపెనీకి కేటాయించిన భూమిలో ఇంకా స్వాధీనం చేయాల్సిన 43 ఎకరాలకు సంబంధించిన సమస్యను వెంటనే పూర్తి చేసి అందచేయాలని సంగారెడ్డి జిల్లా కలెక్టర్‌కు మంత్రి సూచించారు. మరోవైపు, ప్రస్తుత ఆర్థిక సంవత్సరానికి ప్రవేశపెట్టిన సార్వత్రిక బడ్జెట్‌లో ప్రభుత్వరంగ సంస్థల్లో వాటా విక్రయం ద్వారా రూ.50 వేల కోట్లు లక్ష్యంగా పెట్టుకోవడానికి మంత్రి తప్పుపట్టారు. ఇది కన్న బిడ్డలను మరొకరికి అమ్ముకోవడం లాంటిదన్నారు.

మిత్సుయి కెమికల్స్‌ టెక్నికల్‌ సెంటర్‌
జపాన్‌కు చెందిన మిత్సుయి కెమికల్స్‌.. హైదరాబాద్‌లో ప్రపంచ స్థాయి టెక్నికల్‌ సెం టర్‌ను ఏర్పాటు చేయడానికి ఆసక్తి కనబరుస్తున్నది. టీ హబ్‌ ద్వారా లైఫ్‌ సైన్సెస్‌, పెట్రో కెమికల్స్‌ రంగాల స్టార్టప్‌ల్లో రూ.100 కోట్లు పెట్టుబడి పెట్టడానికి సిద్ధంగా ఉన్నట్టు మిత్సు యి ప్రతినిధి హన్మంతరావు తెలిపారు.