కొంతమంది ఎన్ని లిప్‌స్టిక్స్‌ పూసుకున్నా సరే పెదవులు అందవిహీనంగానే కనిపిస్తూనే ఉంటాయి. ఎన్ని క్రీములు రాసినా కూడా పెదవులు పగులుతూనే ఉంటాయి. అలాంటి వారు ఇంట్లో దొరికే ఆహార పదార్థాలతోనే ఆకర్షణీయంగా మార్చుకోవచ్చు. మరి ఆ చిట్కాలు ఏంటో ఇప్పుడు చూద్దాం..
రోజూ రాత్రి పడుకునే ముందు పెదాలకు తేనె రాసి మెత్తని బ్రష్‌తో మృదువుగా రుద్దాలి. ఇలా చేయడం వల్ల ఉదయానికి పొడిబారే సమస్య తగ్గుతుంది. ఇలా వారం రోజులు క్రమం తప్పకుండా చేస్తే మంచి ఫలితం కనిపిస్తుంది.
గుప్పెడు గులాబీ రేకుల్ని ముద్దగా చేసుకుని దానికి చెంచా వెన్న కలుపుకోవాలి. ఈ మిశ్రమానికి రెండు చుక్కల బాదం నూనె చేర్చి పెదాలకు రాసుకుంటే మృదువుగా కనిపిస్తాయి.
తేనె పంచదార ఆలివ్ ఆయిల్‌ల మిశ్రమాన్ని పెదాలకు రాసి మృదువుగా రుద్దితే మృతకణాలు తొలిగిపోతాయి.
కొందరి పెదవులు నలుపు రంగులో ఉన్నాయని బాధపడుతుంటారు. బీట్‌రూట్ రసాన్ని ఉదయాన్నే పెదాలకు రాసుకుంటే పెదాలు మృదువుగా తయారవుతాయి. ఇలా కొన్ని రోజులు చేస్తే పెదాలపై ఉన్న నలుపు రంగు తొలిగిపోతుంది. పెదాల పగుళ్లు సమస్య నుంచి కూడా బయటపడవచ్చు.
పెదవులు మరింత అందంగా కనిపించాలంటే క్రీములు, మర్దన నూనెలు రాసుకుంటే సరిపోదు. వీలైనప్పుడల్లా కొత్తిమీర, పుదీనా, క్యారెట్ జ్యూసులు తాగుతుండాలి. వీటివల్ల చర్మానికి కొత్త కాంతి వస్తుంది.
ఆకుకూరలు తినడం వల్ల కూడా చర్మం కాంతివంతంగా తయారవుతుంది. పెదాలు పగులకుండా ఉంటాయి.
