Supreme Court | చంద్రబాబు బెయిల్‌ రద్దు పిటిషన్‌ విచారణ జనవరి 19కి వాయిదా

Supreme Court | స్కిల్‌ డెవలప్‌మెంట్‌ కేసులో టీడీపీ అధినేత చంద్రబాబు బెయిల్‌ రద్దు పిటిషన్‌ విచారణ జనవరి 19కి వాయిదా పడింది.

అమరావతి : స్కిల్‌ డెవలప్‌మెంట్‌ కేసులో టీడీపీ అధినేత చంద్రబాబు బెయిల్‌ రద్దు పిటిషన్‌ విచారణ జనవరి 19కి వాయిదా పడింది. చంద్రబాబు క్వాష్‌ పిటిషన్‌పై తీర్పు రాకపోవడంతో బెయిల్‌ రద్దు పిటిషన్‌ను సుప్రీంకోర్టు (Supreme Court ) వాయిదా వేసింది. శుక్రవారం జస్టిస్‌ బేలా త్రివేది, జస్టిస్ సతీష్‌ చంద్రశర్మ ధర్మాసనం ఎదుట కేసు విచారణకు రాగా చంద్రబాబు(Chandra Babu) తరఫున సీనియర్‌ న్యాయవాది హరీష్‌సాల్వే వాదించగా ప్రభుత్వం తరఫున మరో న్యాయవాది వాదించారు.

17 ఏ వ్యవహారంపై తీర్పు ఇస్తే మాత్రం వాయిదా వేయాలని, వాయిదా వేయకుంటే విచారణ తేదీ చెప్పాలని హరీష్‌సాల్వే అభ్యర్థించారు. ఇందుకు గాను కౌంటర్‌ దాఖలుకు సిద్ధంగానే ఉన్నామని ఆయన వెల్లడించారు. స్కిల్‌ కేసు 17 ఏ తీర్పుతో ముడిపడి ఉందని హరీష్‌సాల్వే చేసిన వాదనతో ధర్మాసనం ఏకీభవించింది.

ఈ విచారణను జనవరి మూడో వారంలో చేపడతామన్న ధర్మాసనం వెల్లడించగా తేదీ ఖరారు చేయాలని సాల్వే కోరారు. సాల్వే విజ్ఞప్తితో విచారణను జనవరి 19కి వాయిదా వేస్తున్నట్లు ధర్మాసనం స్పష్టం చేసింది. జనవరి 19లోగా కౌంటర్‌ వేయాలని చంద్రబాబు తరుఫు న్యాయవాదికి, ఆ కౌంటర్‌కు రిజాయిండర్‌ దాఖలు చేయాలని ప్రభుత్వానికి సుప్రీం కోర్టు ఆదేశాలు జారీ చేసింది.