MLC Botsa | ఏపీ పోలీసుల మీద నమ్మకం లేదు..కేంద్రబలగాలను రప్పించాలి : ఎమ్మెల్సీ బొత్స

MLC Botsa | ఏపీలో జరుగుతున్న స్థానిక సంస్థల ఎన్నికల్లో కూటమి ప్రభుత్వంతో పోలీసులు , అధికారులు కుమ్మకయ్యారని వైసీపీ నాయకుడు, ఎమ్మెల్సీ బొత్స సత్యనారాయణ ఆరోపించారు.

అమరావతి : ఏపీలో జరుగుతున్న స్థానిక సంస్థల ఎన్నికల్లో కూటమి ప్రభుత్వంతో పోలీసులు ( AP Police ) , అధికారులు కుమ్మకయ్యారని వైసీపీ నాయకుడు, ఎమ్మెల్సీ బొత్స సత్యనారాయణ ( MLC Botsa Satyanarayana ) ఆరోపించారు. రాష్ట్రంలో ఎన్నికల ప్రక్రియ ప్రారంభం నాటి నుంచి వైసీపీ అభ్యర్థులు, నాయకులపై దాడులు, దౌర్జన్యాలు మరింత పెరిగిపోయాయని మీడియా సమావేశంలో వెల్లడించారు.

రాష్ట్ర పోలీసు యంత్రాంగంపై తమకు నమ్మలేదని కేంద్ర బలగాలను ( Central Forces ) రప్పించి శాంతి భద్రతలను కాపాడాలని డిమాండ్‌ చేశారు.  పోలీసుల అండగతో వెన్నుపోటు పార్టీ గూండాలు రెచ్చిపోతున్నారని , ఎన్నికలు నిష్పక్షపాతంగా జరిపించాలని సుప్రీంకోర్టు ఇచ్చిన ఆదేశాలను సైతం అధికారులు అమలు చేయడం లేదని విమర్శించారు.

మరో రెండున్నర సంవత్సరాల్లో తిరిగి వైసీపీ అధికారం లోకి వస్తుందని, ప్రస్తుతం ఎన్నికల్లో జరుగుతున్న అరాచకాలపై న్యాయవిచారణ జరిపిస్తామని వెల్లడించారు. అదేవిధంగా ప్రభుత్వానికి వత్తాసు పలుకుతున్న కిందిస్థాయి అధికారుల నుంచి పైస్థాయి అధికారుల వరకు చర్యలు తీసుకుంటామని తెలిపారు.   నామినేషన్‌ కేంద్రాలకు వచ్చే వైసీపీ అభ్యర్థులన నామినేషన్లు లాక్కొని చించివేస్తున్నారని అన్నారు. ప్రజాస్వామ్యానికి తూట్లు పొడుస్తున్నారని ఆరోపించారు. కూటమి పాలనలో అన్ని వర్గాల ప్రజలు ఇబ్బందులు పడుతున్నారని తెలిపారు. కూటమి అరాచకాలను ప్రజలు గమనిస్తున్నారని తెలిపారు.