Visit:
అమరావతి : తమ డిమాండ్ల సాధనకు కొద్ది రోజులుగా మున్సిపల్ కార్మికులు(Muncipal Strike) చేస్తున్న సమ్మె ముగిసింది. మున్సిపల్ కార్మికులతో జరిపిన చర్చలు ఫలప్రదం కావడంతో సమ్మెను విరమించుకుంటున్నట్లు కార్మిక సంఘాల నాయకులు వెల్లడించారు. రేపటి నుంచి యధావిధిగా విధులకు హాజరవుతామని స్పష్టం చేశారు. బుధవారం మంత్రి వర్గ ఉపసంఘం కార్మికులతో మలి విడత చర్చలు జరిపింది. ఏపీ మంత్రి బొత్స సత్యనారాయణ(Minister Botsa Satyanarayana), అధికారులు కలిసి కార్మిక సంఘాల నాయకులతో చర్చలు జరిపారు.
ఈ సందర్భంగా మంత్రి బొత్స మీడియాతో మాట్లాడుతూ మున్సిపల్ కార్మికులు సమస్యలపై ప్రభుత్వం సానుకూలంగా ఉందని అన్నారు . కార్మికులకు 21 వేల వేతనంతో పాటు, ఇతర సదుపాయాలు కల్పిస్తామని, సమ్మె కాలానికి జీతాలు కూడా చెల్లిస్తామని తెలిపారు. ఈ సంక్రాంతికి ప్రతి కార్మికునికి కొత్త బట్టల కోసం వెయ్యి రూపాయలు ఇవ్వనున్నట్లు వివరించారు.
చనిపోయిన కార్మికులు కుటుంబాలకు నష్టపరిహారం అందిస్తామని, ప్రమాదవశాత్తూ మరణిస్తే అందించే సహాయాన్ని అయిదు నుంచి ఏడు లక్షలకు పెంచినట్లు వెల్లడించారు. 2019 నుంచి దరఖాస్తు చేసుకోని మృతుల కుటుంబాలకు జీవో ఇచ్చిన తర్వాత అప్లై చేసుకుంటే రెండు నెలల్లో ఎక్స్ గ్రేషియా అందజేస్తామని బొత్స సత్యనారాయణ తెలిపారు.
