ఒక్క ఓటుతో గెలిచింది ఒక‌రు..! కేవ‌లం ఒక్క ఓటు మాత్ర‌మే సాధించింది మ‌రొక‌రు.. మున్సిప‌ల్ ఎన్నిక‌ల్లో చిత్ర విచిత్రాలు

AP News | ఏపీ స్థానిక సంస్థల ఎన్నికల కౌంటింగ్(Muncipal elections) ప్రక్రియలో పలు విచిత్రాలు చోటు చేసుకున్నాయి.

AP News | ఏపీ స్థానిక సంస్థల ఎన్నికల కౌంటింగ్(Muncipal elections) ప్రక్రియలో పలు విచిత్రాలు చోటు చేసుకున్నాయి. శ్రీ సత్యసాయి జిల్లా ధర్మవరం మున్సిపాలిటీలో ఆసక్తికర ఫ‌లితం వెలువ‌డింది. పట్టణంలోని 1వ వార్డులో వైసీపీ అభ్యర్థి రామకృష్ణమ్మ కేవలం ఒక్క ఓటు తేడాతో గెలువ‌గా అన‌కామ‌ప‌ల్లి జిల్లా యలమంచిలిలోని 7వ వార్డులో స్వతంత్ర అభ్యర్థిగా పోటీ చేసిన మళ్ల రామకృష్ణకు ఒకే ఒక్క ఓటు రావడం అంద‌రిని ఆశ్చర్యానికి గురి చే సింది. రామ‌కృష్ణ‌ ఏసీ గుర్తుతో పోటీ చేశారు. కాగా అతనికి వచ్చిన ఓటు అతను వేసుకున్నదా? లేక వేరెవరైనా వేశారా అన్నది చర్చనీయాంశమైంది.

ముఖ్యంగా అభ్యర్థి కుటుంబసభ్యులు, బంధువులైనా కనీసం అతనికి ఓట్లు వేయకపోవడం చ‌ర్చ‌నీయాంశంగా మారింది. ఈ వార్డులో నోటాకు 6, కాంగ్రెస్‌ పార్టీ అభ్యర్థికి 6, చెల్లని ఓట్లు 21గా లెక్కతేలాయి. 13వ వార్డులో స్వతంత్ర అభ్యర్థి కోన వరలక్ష్మికి 8 ఓట్లు మాత్రమే పడ్డాయి. 18వ వార్డులో స్వతంత్ర అభ్యర్థికి 13 ఓట్లు, 21వ వార్డులో స్వతంత్ర అభ్యర్థికి 9 ఓట్లు వచ్చాయి. పోటీ చేసిన అభ్య‌ర్థికి ఒక్క ఓటు మాత్ర‌మే రావ‌డం ఇప్పుడు ఇది సోష‌ల్ మీడియాలో వైర‌ల్‌గా మారింది.