Visit:
Cyclone Ditwah | నైరుతి బంగాళాఖాతంలో ఏర్పడిన దిత్వా తుపాన్ భారత్‌వైపు దూసుకొస్తోంది. ప్రస్తుతానికి ఇది కారైకల్‌కు 80కి.మీ., పుదుచ్చేరికి 160 కి.మీ., చెన్నైకి 250 కి.మీ.దూరంలో కేంద్రీకృతమై ఉంది. గడిచిన ఆరు గంటల్లో 5 కి.మీ. వేగంతో ఈ తుపాన్ కదిలింది. రాగల 24 గంటల్లో ఉత్తర తమిళనాడు–పుదుచ్చేరి తీరాలకు సమాంతరంగా కదిలే అవకాశం ఉందని ఏపీ విపత్తుల నిర్వహణ సంస్థ వెల్లడించింది.
దిత్వా తుపాన్ ప్రభావంతో మూడు రోజుల పాటు తేలికపాటి నుంచి మోస్తరు వానలు కురిసే అవకాశం ఉంది. రేపు ఖమ్మం, నల్గొండ, సూర్యాపేట, నాగర్‌కర్నూలు జిల్లాల్లో భారీ వర్షాలు కురిసే అవకాశం ఉందని వాతావరణ శాఖ అంచనా వేసింది. ఏపీలోని నెల్లూరు, చిత్తూరు, తిరుపతి జిల్లాలకు ఏపీ విపత్తుల నిర్వహణ సంస్థ రెడ్ అలర్ట్ జారీ చేసింది. ఈ జిల్లాల్లో భారీ నుంచి అతి భారీ వర్షాలు కురిసే అవకాశం ఉందని తెలిపింది.
ప్రకాశం, కడప, అన్నమయ్య జిల్లాల్లో భారీ వర్షాలు కురుస్తాయని పేర్కొంది. ఈ మేరకు ఆయా జిల్లాలకు ఆరెంజ్ అలర్ట్ జారీ చేసింది. అనంతపురం, సత్యసాయి, కర్నూలు, నంద్యాల, పల్నాడు, బాపట్ల, గుంటూరు జిల్లాల్లో భారీ వర్షాలు కురుస్తాయని తెలిపింది. తీరం వెంబడి 80కి.మీ. వేగంతో ఈదురుగాలులు వీస్తాయని తెలిపింది.
