అనకాపల్లి జిల్లా : ప్రజల భద్రత చూడాల్సిన పోలీసు దారి తప్పాడు. తమ వద్దకు వచ్చే మహిళల్ని గౌరవంగా చూడాల్సిన పోలీసు.. పోలీస్ స్టేషన్నే తన అశ్లీల కార్యక్రమాలకు అడ్డగా మార్చుకున్నాడు. స్టేషన్కు ఫిర్యాదు చేసేందుకు వచ్చిన బాధితులను పట్టించుకోకుండా.. పీఎస్లోనే ఓ మహిళతో రాసలీలల్లో మునిగిపోయాడు. మద్యం మత్తులో ఉండటంతో పాటు ఓ మహిళతో సదరు ఏఎస్ఐ అడ్డంగా బుక్కయ్యాడు.
అనకాపల్లి జిల్లా పరిధిలోని కొత్తకోట పోలీస్ స్టేషన్లో ఏఎస్ఐగా అప్పారావు పనిచేస్తున్నారు. ఆదివారం రాత్రి ఓ మహిళతో పీఎస్లో అశ్లీల కార్యక్రమాలకు పాల్పడుతూ అడ్డంగా దొరికిపోయాడు. పీకల దాకా మద్యం తాగిన ఏఎస్ఐ అప్పారావు.. రాత్రి సమయంలో ఓ మహిళను పోలీస్ స్టేషన్కు తీసుకెళ్లాడు. పీఎస్లోనే రాసలీలలు జరిపాడు. ఇది గమనించిన స్థానికులు సీఐకి సమాచారం ఇచ్చారు. వెంటనే స్టేషన్కు చేరుకున్న సీఐ.. అప్పారావును రెడ్ హ్యాండెడ్ గా పట్టుకున్నారు. మహిళలను అక్కడి నుంచి పంపించివేశాడు.
మహిళతో రెడ్ హ్యాండెడ్గా దొరకడంతో తనను విడిచిపెట్టాలంటూ సీఐ కాళ్లపై పడి ఏఎస్ఐ అప్పారావు వేడుకున్నాడు. మద్యం సేవించి ఉండటమే కాకుండా మహిళను పోలీస్ స్టేషన్కు తీసుకువచ్చి ఇలాంటి అకృత్యానికి పాల్పడడంపై పోలీస్ ఉన్నతాధికారులు ఆగ్రహం వ్యక్తం చేశారు. వైద్య పరీక్షల నిమిత్తం అప్పారావును అనకాపల్లి దవాఖానకు తరలించారు. ప్రస్తుతం ఈ వ్యవహారం చర్చనీయాంశంగా మారింది. ఏఎస్ఐ తీరును స్థానిక మహిళా సంఘాలు తీవ్రంగా ఖండించాయి. ఏఎస్ఐపై శాఖాపరమైన చర్యలు తీసుకోవాలంటూ స్టేషన్ సీఐ ఉన్నతాధికారులకు నివేదించారు.