ఎన్నికలు విధులు పకడ్బందీగా నిర్వహించాలి

వచ్చే పార్లమెంట్‌ ఎన్నికల్లో విధులు కేటాయించబడిన అధికారులు, సిబ్బంది తమ విధులను పకడ్బందీగా నిర్వహించాలని జిల్లా ఎన్నికల అధికారి, కలెక్టర్‌ బదావత్‌ సంతోష్‌ అన్నారు.

• కలెక్టర్‌ బదావత్‌ సంతోష్‌

మంచిర్యాల ఏసీసీ, ఫిబ్రవరి 16: వచ్చే పార్లమెంట్‌ ఎన్నికల్లో విధులు కేటాయించబడిన అధికారులు, సిబ్బంది తమ విధులను పకడ్బందీగా నిర్వహించాలని జిల్లా ఎన్నికల అధికారి, కలెక్టర్‌ బదావత్‌ సంతోష్‌ అన్నారు. శుక్రవారం జిల్లాలోని నస్పూర్‌లో సమీకృత జిల్లా కార్యాలయాల భవన సముదాయంలోని కలెక్టరేట్‌లో అదనపు కలెక్టర్‌ (రెవెన్యూ) సబావత్‌ మోతీలాల్‌తో కలిసి జిల్లా ఎన్నికల అధికారి కార్యాలయ సిబ్బందితో ఎన్నికల విధులు నిర్వహణపై సమీక్షా సమావేశం నిర్వహించారు.

ఈ సందర్భంగా కలెక్టర్‌ మాట్లాడుతూ పార్లమెంట్‌ ఎన్నికల విధుల్లో ఎలాంటి పొరపాట్లకు లేకుండా చూడాలని సూచించారు. ఈవీఎం, పోస్టల్‌ బ్యాలెట్‌, వెబ్‌ కాస్టింగ్‌ ఇతర వివిధ విభాగాల్లో అధికారులకు విధులు కేటాయిస్తున్నట్లు తెలిపారు. విధి నిర్వహణలో ఏమైనా సందేహాలుంటే ఉన్నతాధికారులను సంప్రదించి నివృత్తి చేసుకోవాలని తెలిపారు.

ఎన్నికల నియమ, నిబంధనలపై పూర్తి అవగాహన కలిగి ఉండాలని, ఐటీ సంబంధిత అంశాలపై పూర్తి అప్రమత్తంగా ఉండాలని తెలిపారు. విధి నిర్వహణలో నిర్లక్ష్యం, అలసత్వం చేస్తే భారత ఎన్నికల సంఘం నిబంధనల మేరకు కఠిన చర్యలు తీసుకుంటామని హెచ్చరించారు. ఈ కార్యక్రమంలో సంబంధిత శాఖల అధికారులు తదితరులు పాల్గొన్నారు.