Visit:
అందమైన చర్మానికి కేవలం ఖరీదైన క్రీములు సరిపోవు. ఈ మధ్యకాలంలో బ్యూటీ ప్రపంచంలో ఎక్కువగా వినిపిస్తున్న ట్రెండ్ ‘స్కిన్ బ్యారియర్ కేర్’. అంటే చర్మం సహజంగా కలిగి ఉండే రక్షణ పొరను బలంగా ఉంచడంపై దృష్టి పెట్టడం. ఈ రక్షణ పొర దెబ్బతింటే చర్మం పొడిబారడం, ఎర్రబడటం, మంట, మొటిమలు లాంటి సమస్యలు పెరిగే అవకాశం ఉంటుంది. స్కిన్ బ్యారియర్ను ఆరోగ్యంగా ఉంచాలంటే ముఖాన్ని రోజుకు రెండుసార్లు మాత్రమే మృదువైన క్లెన్సర్తో శుభ్రం చేయాలి. ఆ తర్వాత సిరామైడ్స్, హ్యాలురానిక్ యాసిడ్ లేదా గ్లిజరిన్ ఉన్న మాయిశ్చరైజర్ను వాడితే చర్మంలో తేమ నిలిచి ఉంటుంది.
బయటికి వెళ్లేటప్పుడు ఎస్పీఎఫ్ 30 లేదా అంతకంటే ఎక్కువ ఉన్న సన్స్క్రీన్ తప్పనిసరిగా రాసుకోవాలి. వారానికి ఒకసారి కంటే ఎక్కువగా స్క్రబ్ చేయడం, ఒకేసారి చాలా రకాల యాక్టివ్ ఇంగ్రీడియంట్లు ఉపయోగించడం వల్ల చర్మ రక్షణ పొర బలహీనపడే ప్రమాదం ఉంది. కాబట్టి చర్మం చెప్పే సంకేతాలను గమనిస్తూ, అవసరమైన ఉత్పత్తులనే ఎంచుకోవడం మంచిది. అంతేకాదు, తగినంత నీరు తాగడం, పోషకాహారం తీసుకోవడం, సరిపడా నిద్రపోవడం కూడా చర్మ ఆరోగ్యానికి ఎంతో అవసరం. చర్మాన్ని అతిగా ప్రయోగాలకు గురిచేయకుండా, సహజ సమతుల్యతను కాపాడుకోవడమే ఈ కొత్త బ్యూటీ ట్రెండ్ సందేశం. తక్కువ ఉత్పత్తులతో, సరైన సంరక్షణతోనే సహజమైన మెరుపును సొంతం చేసుకోవచ్చని నిపుణులు సూచిస్తున్నారు.
