నీట్‌గా తగ్గిద్దాం.. మీట్‌!

కొందరు నాన్‌వెజ్‌ ఇష్టంగా తింటారు. వారానికి నాలుగైదుసార్లు లాగించేవాళ్లూ ఉన్నారు. దీనివల్ల వివిధ ఆరోగ్య సమస్యలు వస్తాయని డాక్టర్లు చెబుతున్నారు. మాంసాహారం
తగ్గించాలని మనసులో ఉన్నా , ఎలా తగ్గించాలో తెలియక ఇబ్బంది పడేవారికి కొన్ని సూచనలు..
పూర్తిగా వదిలేయడం కష్టంగా అనిపిస్తే సెమీ వెజిటేరియన్‌గా మారిపోవచ్చు. అలాచేస్తే, బాడీ వెయిట్‌ తగ్గుతుందని, మెటబాలిక్‌ వ్యాధులు, టైప్‌-2 డయాబెటిస్‌ వచ్చే ఆస్కారం తక్కువని నిపుణుల మాట.

కొందరికి రోజూ నాన్‌వెజ్‌ తినే అలవాటు ఉంటుంది. అలాంటివారు వారానికి ఒకరోజు మానేయాలి. క్రమంగా రెండు, మూడు రోజులకు విస్తరించాలి. అంతిమంగా వారానికోరోజు మాత్రమే తినేలా ప్లాన్‌ చేసుకోవాలి.

• ఒకేసారి ప్లేట్‌నిండా వేసుకోవడానికి బదులు, సైడ్‌ డిష్‌గా మార్చుకోవాలి.
• మాంసం తినకపోతే ప్రొటీన్‌ ఎలా అందుతుందంటారు చాలామంది. మాంసానికి బదులు ప్రొటీన్‌ పుష్కలంగా ఉండే మొలకలు, బీన్స్‌ మొదలైనవి తినవచ్చు.
• వెజిటేరియన్‌ వంటల్లో నచ్చినవాటిని మొదట తీసుకుంటూ భోజనం ప్రారంభించాలి. అలా చేస్తే మాంసం తినాలన్న కోరిక క్రమంగా తగ్గుతుంది.
• ఏ పూటకు ఆ పూట వంటలను ముందుగానే ప్లాన్‌ చేసుకోవాలి. దానికి కట్టుబడి ఉండాలి.