Kriti Shetty | కంఫర్ట్‌ను బట్టే ఆ స‌న్నివేశాలు బాగా వస్తాయి.. లిప్‌లాక్ సీన్ల‌పై కృతిశెట్టి ఇంట్రెస్టింగ్ కామెంట్స్‌

December 26, 2021 / 11:43 AM IST

Kriti Shetty | అందం, అమాయకత్వం, కొంటెతనం కలబోసిన పల్లెటూరి యువతి బేబమ్మగా ‘ఉప్పెన’ చిత్రంతో తెలుగు ప్రేక్షకుల హృదయాలకు చేరువైంది కృతి శెట్టి. ఆమె కథానాయికగా నటించిన తాజా చిత్రం ‘శ్యామ్‌సింగరాయ్‌’ ఇటీవలే ప్రేక్షకుల ముందుకొచ్చింది. ఈ సందర్భంగా కృతి శెట్టి పంచుకున్న ముచ్చట్లు…

తొలి సినిమాకే పూర్తి భిన్నమైన పాత్రను ఎంచుకున్నారు. కారణం?

‘ఉప్పెన’లోని బేబమ్మకు, ‘శ్యామ్‌సింగరాయ్‌’లోని కీర్తి పాత్రకు చాలా వ్యత్యాసం ఉంది. బేబమ్మ పాత్ర పల్లెటూరి సంస్కృతీ సంప్రదాయాలతో ముడిపడిసాగుతుంది. ‘శ్యామ్‌సింగరాయ్‌’లో హైదరాబాద్‌లో పుట్టిపెరిగిన ఆధునిక యువతిగా నటించాను. ఈ పాత్ర కోసం నవతరం అమ్మాయిల మనస్తత్వాలు, హావభావాలు ఎలా ఉంటాయో పరిశోధించాను. కొన్ని ఇంగ్లిష్‌ సినిమాల్నీ చూశాను. ఆ స్ఫూర్తితో పాత్రలో ఒదిగిపోయేందుకు ప్రయత్నించాను.

కీర్తి పాత్రకు న్యాయం చేసేందుకు ఎలాంటి జాగ్రత్తలు తీసుకున్నారు?

తెరపై నా పాత్రను పండించడానికి దర్శకుడి సూచనలతో పాటు నేనూ సొంతంగా పరిశోధన చేస్తుంటా. పాత్ర తీరుతెన్నులు, వస్త్రధారణ, ఆహారం.. ఏవంటే ఇష్టమో పేపర్‌పై రాసుకుంటాను. ఈ సినిమాలో చిన్నతనంలోనే తల్లి ప్రేమకు దూరమై, తండ్రి సంరక్షణలో పెరిగే అమ్మాయిగా కనిపిస్తా. ఆ లక్షణాలకు అనుగుణంగానే టామ్‌బాయ్‌గా నా పాత్రను డిజైన్‌ చేశారు.

సినిమాలో మీకు చాలెంజింగ్‌గా అనిపించిన ఘట్టాలు?

సిగరెట్‌ తాగే సన్నివేశం సవాల్‌గా అనిపించింది. నేను స్మోకింగ్‌ ఇష్టపడను. దర్శకుడు చెప్పగానే భయపడ్డా. ఆ సీన్‌ తొలగించమని కూడా అడిగా. అలాంటి సన్నివేశాల్లో నటించినప్పుడే ఆఫ్‌స్క్రీన్‌, ఆన్‌స్క్రీన్‌ మధ్య వేరియేషన్‌ చూపించగలుగుతావని దర్శకుడు రాహుల్‌ సూచించారు. నా కోసం నికోటిన్‌ లేని హెర్బల్‌ సిగరెట్‌ తెప్పించారు. స్మోకింగ్‌ సీన్‌ ఫొటో షూట్‌ సమయంలో సిగరెట్‌ పట్టుకోగానే చేతులు వణికాయి. సిగరెట్‌ ఎలా పట్టుకోవాలో, ఎలా తాగాలో మూడు రోజులు నేర్చుకున్నా.

నానితో తొలిసారి కలిసి నటించడం ఎలాంటి అనుభూతిని పంచింది?

కథానాయికగా ఒక సినిమా అనుభవమే ఉంది నాకు. తొలిరోజు సెట్స్‌లో అడుగుపెట్టే ముందు చాలా భయపడ్డా. నాని నన్ను ఎలా రిసీవ్‌ చేసుకుంటారో, అనుభవలేమితో నేను చేసే తప్పుల్ని చూసి ఏమంటారో అనుకున్నా. కానీ ఆయన అవేవీ పట్టించుకోలేదు. నా భయాల్ని పోగొట్టి ధైర్యాన్నిచ్చారు. తన ఒక్కడి నటనపైనే దృష్టిపెట్టకుండా సెట్స్‌లో అందరినీ గమనిస్తూ ఉంటారాయన. ఇతరుల తప్పుల్ని సున్నితంగా సరిదిద్దుతుంటారు.

ఈ సినిమాకు మీరు అందుకున్న బెస్ట్‌ కాంప్లిమెంట్‌?

కీర్తి పాత్రలో బాగా నటించానని నాన్న మెచ్చుకున్నారు. షూటింగ్‌ సమయంలో ఏ రోజూ నాన్న సెట్స్‌కు రాలేదు. నా లుక్‌, పాత్ర గురించి ఆయనకు అవగాహన లేదు. థియేటర్‌లో సినిమా చూశాక మాత్రం సంతోషంగా ఫీలయ్యారు. రియల్‌ లైఫ్‌కి భిన్నంగా కొత్తగా కనిపించానని మెచ్చుకున్నారు.

సినిమాల ఎంపికలో ఏ అంశాలకు ప్రాధాన్యమిస్తారు?

‘ఉప్పెన’ తర్వాత పల్లెటూరి అమ్మాయి పాత్ర కోసం చాలా మంది దర్శకులు నన్ను సంప్రదించారు. ఒకే తరహా పాత్రలు చేస్తే ప్రేక్షకులు తిరస్కరిస్తారని అనిపించింది. నటన పరంగా నాలోని భిన్నత్వాన్ని చూపే అవకాశం ఉంటుందనే ‘శ్యామ్‌సింగరాయ్‌’ చిత్రాన్ని అంగీకరించా. రెండు సినిమాలతోనే తెలుగు ప్రేక్షకులు నాపై ఎంతో ప్రేమను కురిపిస్తున్నారు. వారి అభిమానాన్ని నిలబెట్టుకోవాలంటే నిత్యం కష్టపడాల్సిందేనని నమ్ముతా.

తదుపరి సినిమాల విశేషాలు?

నాగార్జున, నాగ చైతన్యతో నటిస్తున్న ‘బంగార్రాజు’ షూటింగ్‌ పూర్తయింది. రామ్‌-లింగుస్వామి కలయికలో వస్తున్న సినిమాతో తమిళంలో అరంగేట్రం చేయబోతున్నా. విరించి వర్మ దర్శకత్వంలో ఓ మహిళా ప్రధాన చిత్రానికి సంబంధించి చర్చలు జరుగుతున్నాయి. నితిన్‌ హీరోగా ‘మాచర్ల నియోజకవర్గం’ ఏప్రిల్‌లో విడుదల కానుంది. సుధీర్‌బాబుతో మరో సినిమా చేస్తున్నా.

లిప్‌లాక్‌ సన్నివేశాల్లో నటించడానికి ఇబ్బంది పడ్డారా? ఆ తరహా సన్నివేశాలపై మీ అభిప్రాయం?

బోల్డ్‌, లిప్‌లాక్‌ సన్నివేశాలను చాలా మంది చులకన భావంతో చూస్తారు. వాటిలో నటిస్తే కథానాయికల కెరీర్‌ ఇబ్బందుల్లో పడుతుందనే అపోహ ఉంది. లిప్‌లాక్‌ నటనలో భాగమేనని నమ్ముతా. యాక్షన్‌ సీన్స్‌లానే బోల్డ్‌ సీన్స్‌లోనూ నటిస్తాను. ప్రత్యేకంగా చూడను. నాయకా
నాయికల మధ్య కంఫర్ట్‌ను బట్టే లిప్‌లాక్‌ సీన్స్‌ బాగా వస్తాయి. కథలో లిప్‌లాక్‌ సన్నివేశాలకు ప్రాధాన్యం లేకపోతే నేను నటించను.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి