Health Tips for Children’s | చిన్నపిల్లల ఊపిరితిత్తులు కాస్త బలహీనంగా ఉంటాయి. శ్వాస పీల్చుకునే మార్గం కొంచెం సన్నగా ఉంటుంది. ఫలితం! త్వరగా జలుబు చేయడం, కఫం పేరుకుపోవడం, న్యుమోనియాలాంటి సమస్యలకు దారితీయడం జరుగుతుంది. అందుకే శీతకాలంలో పిల్లల ఆరోగ్యం పట్ల కాస్త జాగ్రత్తగా ఉండాల్సిందే! అందుకోసం…
వెచ్చని దుస్తులు: చలికాలం పిల్లల ఒంటి నిండా దుస్తులు ఉండేలా చూడాలి. దానివల్ల బయట చలి నుంచే కాదు… ఒంట్లోని వేడి కూడా కరిగిపోకుండా కాపాడినవాళ్లం అవుతాం. వీలైతే ఉన్ని దుస్తులూ వాడవచ్చు. చేతులకు, కాళ్లకు కూడా గ్లవ్స్, సాక్స్ తొడిగినా మంచిదే!
మసాజ్: గోరువెచ్చని నువ్వులనూనె, కొబ్బరినూనె లాంటివాటితో పిల్లల ఒంటిని మసాజ్ చేయడం వల్ల వారి శరీరంలో రక్తప్రసరణ మెరుగుపడుతుంది. ఒళ్లు వెచ్చగా ఉండేందుకు, బాగా నిద్రపట్టేందుకు సాయపడుతుంది.
పోషకాహారం: తల్లిపాలలో పిల్లలకు కావల్సిన పోషకాలన్నీ అందుతాయి. వీటితోపాటు వయసును బట్టి తాజా పండ్ల్లు, కాయగూరలు అందిస్తుంటే రోగ నిరోధకశక్తి పెరిగి జలుబు, దగ్గు లాంటి సమస్యలను తేలికగా ఎదుర్కోగలరు.
ముందుజాగ్రత్త: పిల్లల్లో ఊపిరి పీల్చుకోవడంలో ఇబ్బందులు, ఎగశ్వాస, నిద్రపట్టకపోవడం, ఒళ్లు వెచ్చబడటం లాంటి లక్షణాలను ఎప్పటికప్పుడు గమనించుకోవాలి. అవసరమైతే వైద్యుడిని సంప్రదించాలి. రూమ్ హీటర్స్ వాడటం, చలిగాలుల్లో తిప్పేటప్పుడు తగిన జాగ్రత్తలు తీసుకోవడం లాంటి చర్యలతో శీతకాలంలో పిల్లల ఆరోగ్యాన్ని కాపాడుకోవచ్చు.