Curd | పెరుగుకూ సీనుంది!

ఇప్పుడంతా ఇన్‌స్టాగ్రామ్‌ యుగం. అందులో అందంగా కనిపిస్తేనే, ఉత్పత్తి నలుగురినీ ఆకట్టుకునే అవకాశం ఉంటుంది. దుస్తులు, యాక్సెసరీల్లోనే కాదు ఫుడ్‌ విషయంలోనూ ఇదే ఫ్యాషన్‌ అయిపోయింది.

Curd | ఇప్పుడంతా ఇన్‌స్టాగ్రామ్‌ యుగం. అందులో అందంగా కనిపిస్తేనే, ఉత్పత్తి నలుగురినీ ఆకట్టుకునే అవకాశం ఉంటుంది. దుస్తులు, యాక్సెసరీల్లోనే కాదు ఫుడ్‌ విషయంలోనూ ఇదే ఫ్యాషన్‌ అయిపోయింది. అందుకే ఆహారాన్ని అందంగా తీర్చిదిద్దేందుకు తమ క్రియేటివిటీ అంతటినీ వినియోగిస్తున్నారు తయారీదారులు.

అవీ ఇవీ అని కాదు, చివరికి పెరుగు తోబుట్టువు అయిన యోగర్ట్‌నూ ఇలాగే ఆకర్షణీయంగా తయారు చేస్తున్నారు. ఇక్కడి గ్లాసుల్లో సీనరీని తలపిస్తున్న పదార్థం యోగర్టే. పండ్ల ముక్కలు, గింజలు, కొన్ని రకాల జూసుల్ని కలిపి వీటిని ఇలా సీనరీని తలపించేలా రూపొందిస్తున్నది చైనాకు చెందిన బ్లూగ్లాస్‌ అనే ఆహారోత్పత్తి సంస్థ.

ఇందులోని రంగుల కోసం అవకాడో, స్ట్రాబెర్రీ, బ్లూబెర్రీలాంటి రకరకాల పండ్లను వాడుతున్నది. చూస్తుంటే తమకిష్టమైన విండోస్‌వాల్‌ పేపర్‌లా ఉందని, దాన్ని చటుక్కున తాగేసే అవకాశం ఇది అనీ… నెటిజన్లు స్పందిస్తున్నారు. ప్రొబయాటిక్‌గా పనికొస్తూ జీర్ణవ్యవస్థను ఆరోగ్యంగా ఉంచేందుకు సాయపడే యోగర్ట్‌కి ఇప్పుడు అభిమానులు పెరిగిపోవడంతో, వారిని ఆకట్టుకోవడానికి తాము ఇలా సీనరీని పోలిన అలంకారం చేస్తున్నామని సదరు సంస్థ చెబుతున్నది. ఆరోగ్యం – అందం ఒకే గ్లాసులో ఉన్నాయన్నమాట!