వినాయకం.. వినూత్నం..

వినాయక నవరాత్రోత్సవాలు అంగరంగ వైభవంగా సాగుతున్నాయి. సోమవారం వీధివీధినా భక్తుల కోలాహలం నడుమ గణనాథులు కొలువుదీరగా విభిన్న రూపాల్లో ఉన్న వినాయకులు ఆకట్టుకున్నాయి.

• ఆకట్టుకుంటున్న వెరైటీ గణనాథులు
• కొంగొత్త సెట్టింగ్‌లు, సందేశాత్మక విగ్రహాలు
• వైభవంగా కొనసాగుతున్న నవరాత్రోత్సవాలు
• భక్తులతో కోలాహలంగా వీధులు

వినాయక నవరాత్రోత్సవాలు అంగరంగ వైభవంగా సాగుతున్నాయి. సోమవారం వీధివీధినా భక్తుల కోలాహలం నడుమ గణనాథులు కొలువుదీరగా విభిన్న రూపాల్లో ఉన్న వినాయకులు ఆకట్టుకున్నాయి. ఒక్కోచోట ఒక్కో రకమైన సెట్టింగ్‌తో మండపాలను డెకొరేట్‌ చేసి ఏర్పాటుచేసిన వెరైటీ విగ్రహాలు చూడముచ్చటగా ఉన్నాయి. వరంగల్‌ నగరంతో పాటు ఉమ్మడి జిల్లాలోని పలు ప్రాంతాల్లో ఉన్న తీరొక్క గణనాథులు ప్రత్యేక ఆకర్షణగా నిలుస్తున్నాయి.

డ్రైఫ్రూట్స్‌ గణపతి, స్పైసెస్‌ గణపతి, త్రివర్ణ గణపతి, ప్రజల సమస్యలు తెలుసుకునే పోలీస్‌ వేషధారణలో ఉన్న ఖాకీ గణపతి, ఐస్రో ప్రయోగించిన చంద్రయాన్‌ సెట్టింగ్‌లో కొలువుదీరిన గణపతి, మేఘాల్లో నక్షత్రాల నడుమ మెరిసిపోతున్న బాలగణపతి.. మరోచోట ట్రాఫిక్‌ పోలీస్‌లా మూషికుడు.. హెల్మెట్‌ ప్రాధాన్యాన్ని తెలియజేస్తున్న వినాయకుడి విగ్రహాలు ఆలోచింపజేశాయి. నిండైన రూపం, రకరకాల రంగుల విగ్రహాలే గాక ప్రజలకు సందేశాన్నిచ్చే వినాయకులను నెలకొల్పడంతో భక్తులు ఆసక్తిగా తిలకిస్తున్నారు.