హనుమకొండ చౌరస్తా, ఏప్రిల్ 2: వరంగల్ నిట్ ఈనెల 5 నుంచి 7 వరకు వార్షిక సాంసృతిక ఉత్సవం స్ప్రింగ్ స్ప్రీకి ము స్తాబైంది. 1978 నుంచి ఈ కార్యక్రమం దక్షిణ భారతదేశంలోని అతిపెద్ద సాంసృతిక ఉత్సవాల్లో ఒకటి. స్ప్రింగ్ స్ప్రీ కళ, సాహిత్యం, నాటకం, నృత్యం, సంగీతం, క్విజ్, ఫొటోగ్రఫీ, పెయింటింగ్, ఫ్యాషన్ షో, రాక్ మ్యూజిక్ కాంపిటీషన్ విభాగాల్లో అనేక ఈవెంట్లను ప్రదర్శిస్తారు. స్పాట్లైట్ ఈవెంట్లు(నాటకం, నృత్యం, కళలు), కొరియోనైట్ (డ్యాన్స్), అల్లూర్ (ఫ్యాషన్ షో), డైరెక్టర్స్ కట్ (కళాకారులు దర్శకులను ప్రోత్సహించే కార్యక్రమం), నుకడ్ నాటక్(సామాజిక సమస్యలపై దృష్టిసారించే వీధి నాటకం) వివిధ క్లబ్ల నుంచి కార్యక్రమాలు నిర్వహించనున్నారు.
ఈ సంవత్సరం, రెండు ప్రోషోలు ఉంటాయి. ఏప్రిల్ 5న గాయకుడు హరిచరణ్, ప్రముఖ సౌత్ ఇండియన్ రాక్ బ్యాండ్ రస్తా ప్రదర్శన ఇవ్వనున్నట్లు, 6న గాయకుడు నకాశ్ అజీజ్, ఇండియన్ రాక్ బ్యాండ్ లోహర్-ది బ్లాక్ స్మిత్ ప్రదర్శన ఉంటుందని నిర్వాహకులు తెలిపారు. నిట్ విద్యార్థులు, ఇతర విద్యాసంస్థలకు చెందిన విద్యార్థులు మూడు రోజుల పాటు జరిగే ఉత్సవాల్లో పాల్గొంటారని నిట్ డైరెక్టర్ ప్రొఫెసర్ బిద్యాధర్ సుబుధి, స్టూడెంట్ వెల్ఫేర్ డీన్ ప్రొఫెసర్ డీ శ్రీనివాసాచార్య తెలిపారు.