తెలంగాణలో భారీగా తగ్గిన నిరుద్యోగ రేటు

దేశంలో అనేక రాష్ర్టాలను నిరుద్యోగ సమస్య పట్టిపీడిస్తుంటే, తెలంగాణలో మాత్రం అతి తక్కువ నిరుద్యోగిత రేటు నమోదయ్యింది. జాతీయ సగటుకన్నా అతి తక్కువ రేటును మన రాష్ట్రం నమోదుచేసింది. గత నెలలో రాష్ట్రంలో నిరుద్యోగిత రేటు 0.7 శాతంగా ఉన్నది. అదే సమయంలో జాతీయ నిరుద్యోగిత రేటు 6.57 శాతంగా నమోదయ్యింది.

• జనవరిలో రాష్ట్రంలో రేటు 0.7 శాతమే
• జాతీయ నిరుద్యోగిత రేటు 6.57 శాతం
• 26 రాష్ర్టాలకన్నా మన వద్దే అతి తక్కువ
• ఉద్యోగ కల్పన, ఉపాధి రంగాల్లో టాప్‌
• బీజేపీ పాలిత హర్యానాలో భారీ నిరుద్యోగిత
• వివరాలు వెల్లడించిన సీఎంఐఈ సంస్థ

హైదరాబాద్‌, ఫిబ్రవరి 3 (నమస్తే తెలంగాణ): దేశంలో అనేక రాష్ర్టాలను నిరుద్యోగ సమస్య పట్టిపీడిస్తుంటే, తెలంగాణలో మాత్రం అతి తక్కువ నిరుద్యోగిత రేటు నమోదయ్యింది. జాతీయ సగటుకన్నా అతి తక్కువ రేటును మన రాష్ట్రం నమోదుచేసింది. గత నెలలో రాష్ట్రంలో నిరుద్యోగిత రేటు 0.7 శాతంగా ఉన్నది. అదే సమయంలో జాతీయ నిరుద్యోగిత రేటు 6.57 శాతంగా నమోదయ్యింది. బీజేపీ పాలిత హర్యానాలో అత్యధికంగా 23.4 శాతం ఉండగా, రాజస్థాన్‌ 18.9 శాతంతో రెండో స్థానంలో నిలిచింది. 2022 జనవరికి సంబంధించిన నిరుద్యోగిత రేటు నివేదికను సెంటర్‌ ఫర్‌ మానిటరింగ్‌ ఇండియన్‌ ఎకానమీ (సీఎంఐఈ) ఇటీవల విడుదల చేసింది.

కరోనా వెంటాడుతున్నా..

ప్రభుత్వం చేపట్టిన నిర్మాణాత్మక చర్యలతో రాష్ట్రంలో నిరుద్యోగిత రేటు వేగంగా తగ్గుతున్నది. ఉపాధి, ఉద్యోగ అవకాశాలు పెరుగుతుండటంతో అందరికీ పని దొరుకుతున్నది. 2020 మే నెలలో రాష్ట్రంలో నిరుద్యోగిత రేటు 14.7 శాతం ఉన్నది. అప్పుడే కరోనా దేశంలోకి ప్రవేశించింది. ఆ తర్వాత మూడు దశల్లో కరోనా వెంటాడినా రాష్ట్రంలో నిరుద్యోగిత రేటు క్రమంగా తగ్గటం విశేషం. రెండేండ్లలోనే నిరుద్యోగిత రేటు ఒకశాతం కన్నా తక్కువకు పడిపోయింది. రాష్ట్రంలోకి ఉత్పాదక, నిర్మాణ రంగాల్లో పెట్టుబడులు వెల్లువలా వస్తున్నాయి. అనేక జాతీయ, అంతర్జాతీయ సంస్థలు పెట్టుబడులు పెట్టేందుకు ముందుకొస్తున్నాయి. దీంతో ఉపాధి కల్పనలో రాష్ట్రం పురోగతి సాధిస్తున్నట్టు నిపుణలు అంచనా వేస్తున్నారు.