Visit:
TS Weather | తెలంగాణవ్యాప్తంగా మరో రెండు రోజుల పాటు తేలికపాటి నుంచి మోస్తరు వర్షాలు కురిసే సూచనలున్నాయని హైదరాబాద్‌ వాతావరణ కేంద్రం తెలిపింది. పలు జిల్లాల్లో భారీ నుంచి అతిభారీ వర్షాలు, మరికొన్ని జిల్లాల్లో భారీ వర్షాలు కురుస్తాయని అంచనా వేసింది. సోమవారం నుంచి మంగళవారం ఉదయం వరకు జగిత్యాల, కరీంనగర్‌, వికారాబాద్‌, సంగారెడ్డి, మెదక్‌, మహబూబ్‌నగర్‌, నాగర్‌ కర్నూల్‌ జిల్లాల్లో అతిభారీ వానలు పడే ఛాన్స్‌ ఉందని తెలిపిన వాతావరణశాఖ.. ఆరెంజ్‌ అలెర్ట్‌ జారీ చేసింది.
ఆసిఫాబాద్‌, మంచిర్యాల, నిర్మల్‌, నిజామాబాద్‌, రాజన్న సిరిసిల్ల, భూపాలపల్లి, కొత్తగూడెం, ఖమ్మం, నల్గొండ, సూర్యాపేట, మహబూబాబాద్‌, హన్మకొండ, సిద్దిపేట, కామారెడ్డి, వనపర్తి, జోగులాంబ గద్వాల జిల్లాల్లో భారీ వర్షాలు పడతాయని చెప్పింది. ఆయా జిల్లాలకు ఎల్లో అలెర్ట్‌ను జారీ చేసింది.
మంగళవారం నుంచి బుధవారం వరకు మంచిర్యాల, నిర్మల్‌, నిజామాబాద్‌, జగిత్యాల, రాజన్న సిరిసిల్ల, భూపాలపల్లి, ములుగు, మహబూబాబాద్‌, వరంగల్‌, హన్మకొండ, జనగాం జిల్లాల్లో అక్కడక్కడ అతి భారీ వానలు పడే ఛాన్స్‌ ఉందని అంచనా వేసింది. ఆయా జిల్లాలకు ఆరెంజ్‌ అలెర్ట్‌ చేయగా.. ఉమ్మడి ఆదిలాబాద్‌, కరీంనగర్‌, రంగారెడ్డి జిల్లాలతో పాటు ఖమ్మం, నల్గొండ, సూర్యాపేట, యాదాద్రి భువనగిరి, కామారెడ్డి, మహబూబ్‌నగర్‌లో జిల్లా భారీ వర్షాలు పడుతాయని వివరించింది.
