హైదరాబాద్ : రాష్ట్రంలో రాగల మూడు రోజులు పొడి వాతావరణం ఏర్పడే అవకాశాలున్నాయని హైదరాబాద్ వాతావరణ కేంద్రం తెలిపింది. ఉత్తర, ఈశాన్య దిశల నుంచి తెలంగాణ రాష్ట్రం వైపు కింది స్థాయి గాలులు వీస్తున్నాయని పేర్కొంది. రాబోయే నాలుగు రోజులు రాత్రి ఉష్ణోగ్రతలు చాలా ప్రదేశాల్లో సాధారణం కన్నా రెండు నుంచి నాలుగు డిగ్రీల వరకు తగ్గే అవకాశం ఉందని తెలిపింది. గ్రేటర్ హైదరాబాద్ పరిధిలోని యూనివర్సిటీ ఆఫ్ హైదరాబాద్లో (సర్కిల్ నం.20 షేరిలింగంపల్లి) 8.2 డిగ్రీ కనిష్ఠ ఉష్ణోగ్రత నమోదైందని, 30.2 డిగ్రీల గరిష్ఠ ఉష్ణోగ్రత నమోదైందని పేర్కొంది. గడిచిన 24 గంటల్లో అత్యల్పంగా సంగారెడ్డి జిల్లా కోహిర్లో 6.5 డిగ్రీలు, అత్యధికంగా వనపర్తి జిల్లా కానాయిపల్లిలో 34 డిగ్రీల ఉష్ణోగ్రత నమోదైందని పేర్కొంది.