ముందుకు సాగని బదిలీలు!

రాష్ట్రంలోని వివిధ శాఖల్లో ఉద్యోగుల సాధారణ బదిలీల ప్రక్రియ ముందుకు సాగడం లేదు. ఆయా శాఖల్లో ఎక్కడ వేసిన గొంగలి అక్కడే అన్న చందంగా ఉంది. ముఖ్యంగా సీఎం రేవంత్‌రెడ్డి వద్దే ఉన్న విద్యాశాఖకు సంబంధించిన బదిలీల మార్గదర్శకాలే ఇంకా జారీ కాలేదు.

• విద్యాశాఖలో ఇంకా విడుదల కాని మార్గదర్శకాలు
• గడువు పొడిగింపు కోరే యోచనలో అధికారులు

హైదరాబాద్‌, జూలై 14 (నమస్తే తెలంగాణ) : రాష్ట్రంలోని వివిధ శాఖల్లో ఉద్యోగుల సాధారణ బదిలీల ప్రక్రియ ముందుకు సాగడం లేదు. ఆయా శాఖల్లో ఎక్కడ వేసిన గొంగలి అక్కడే అన్న చందంగా ఉంది. ముఖ్యంగా సీఎం రేవంత్‌రెడ్డి వద్దే ఉన్న విద్యాశాఖకు సంబంధించిన బదిలీల మార్గదర్శకాలే ఇంకా జారీ కాలేదు. ఇంటర్మీడియట్‌, సాంకేతిక, కళాశాల విద్యాశాఖల్లో లెక్చరర్లు, ఉద్యోగులు బదిలీల ప్రక్రియ ఒక్క అడుగు కూడా ముందుకు పడలేదు. దీంతో ఈ నెల 20లోపు బదిలీలు పూర్తయ్యే అవకాశం కనిపించడం లేదు. రాష్ట్రంలో ఉద్యోగులకు సాధారణ బదిలీలపై నిషేధాన్ని ఎత్తివేస్తూ ఈ నెల 3న సర్కారు జీవో జారీ చేసిన విషయం తెలిసిందే.

16 రోజుల్లో ప్రక్రియ పూర్తయ్యేలా ప్రభుత్వం షెడ్యూల్‌ను విడుదల చేసింది. ప్రక్రియంతా పూర్తయ్యి ఈ నెల 19, 20 తేదీల్లో బదిలీల ఉత్తర్వులు విడుదల కావాల్సి ఉంది. కానీ, ఇప్పటివరకు విద్యాశాఖలోని పలు హెచ్‌వోడీల్లో మార్గదర్శకాలే విడుదల కాలేదు. దీంతో బదిలీలు సకాలంలో జరుగుతాయా? లేదా అన్న అనుమానాలు వ్యక్తమవుతున్నాయి. ఇప్పటికిప్పుడు మార్గదర్శకాలు విడుదలైతే ప్రక్రియ పూర్తయ్యేందుకు 10 రోజులు పడుతుంది. ఈ నేపథ్యంలో మరో 5 రోజులు గడువు పొడగించాలని కోరనున్నట్లు తెలిసింది.