హైదరాబాద్ సిటీబ్యూరో, ఏప్రిల్ 8 (నమస్తే తెలంగాణ): అది హైదరాబాద్లోని అబిడ్స్. నిత్యం రద్దీగా ఉండే బాబూ జగ్జీవన్రామ్ చౌరస్తా. హైకోర్టు ప్రధాన న్యాయమూర్తి జస్టిస్ సతీశ్చంద్రశర్మ ప్రతిరోజూ వెళ్లే మార్గం అది. అంత ప్రాధాన్యం ఉన్న ఆ మార్గంలో అబిడ్స్ ట్రాఫిక్ ఠాణా హోంగార్డు అష్రఫ్ అలీ ట్రాఫిక్ విధులు నిర్వహిస్తుంటారు. శుక్రవారం.. ఎప్పటిమాదిరిగా అష్రఫ్ విధులు నిర్వహిస్తుండగా.. ప్రధాన న్యాయమూర్తి కారు అకస్మాత్తుగా చౌరస్తాలో ఆగింది. అంతే. హోంగార్డు గుండె అదిరింది. తాను ఏదో తప్పు చేశానని కలవరపడ్డాడు. ఏమైందోనని భయపడిపోయాడు. అంతలోనే చీఫ్ జస్టిస్ కారులో నుంచి దిగారు. హోంగార్డుకు పుష్పగుచ్ఛం అందజేశారు. ఇది కలయా? నిజమా? ఊహించని ఈ పరిణామంతో అష్రఫ్ ఉక్కిరిబిక్కిరి అయ్యారు. అంతలోనే.. కంగ్రాట్స్.. విధులు బాగా నిర్వహిస్తున్నావ్.. అంటూ ప్రధాన న్యాయమూర్తి అభినందించారు. విధి నిర్వహణలో హోంగార్డు నిబద్ధతను ప్రతిరోజూ గమనిస్తున్న చీఫ్ జస్టిస్ ఇలా కారు ఆపి, పుష్పగుచ్ఛం ఇచ్చి అభినందించడం విశేషం.
శుక్రవారం అకస్మాత్తుగా చౌరస్తాలో హైకోర్టు సీజే కారు ఆగింది. కారు నెమ్మదవుతుండగానే గుండె ధడేల్మన్నది. ఏ తప్పు జరిగిందోనని భయపడ్డా. ఆయన నన్ను పిలిచి బొకే ఇవ్వడంతో ఎంతో సంతోషపడ్డా. డ్యూటీ బాగా చేస్తున్నావు.. అని సీజే అభినందించడంతో అప్పటివరకు ఉన్న భయంపోయింది. నేనేంది..? నన్ను హైకోర్టు చీఫ్ జస్టిస్ అభినందించడం ఏంది..? అని కొన్ని క్షణాలు అర్థం కాలేదు. ప్రధాన న్యాయమూర్తి అభినందించడం నాకు, నా కుటుంబానికి ఎంతో ఆనందాన్ని ఇచ్చింది. నేను సుమారు 23 ఏండ్లుగా హోంగార్డుగా పనిచేస్తున్నా. ఈరోజు నా జీవితంలో ఎన్నటికీ మరువలేను.
-అష్రఫ్ అలీ, హోంగార్డు