ఆవిర్భావ వేడుకలతో ఒకే వేదికపైకి ఎన్నారైలు… బీఆర్‌ఎస్‌ ఎన్నారై కోఆర్డినేటర్‌ మహేశ్‌ బిగాల

తెలంగాణ ఉద్యమ త్యాగాలను స్మరించుకుంటూ ప్రపంచవ్యాప్తంగా ఉన్న మన బిడ్డలను ఆవిర్భావ వేడుకలు ఒకే వేదికపైకి తీసుకొస్తున్నాయని బీఆర్‌ఎస్‌ ఎన్నారై కో ఆర్డినేటర్‌ మహేశ్‌ బిగాల పేర్కొన్నారు. ఈ మేరకు మంగళవారం ఆయన ఒక ప్రకటన విడుదల చేశారు. తెలంగాణ గౌరవాన్ని అంతర్జాతీయస్థాయిలో విస్తరించేందుకు ప్రవాసులు ఏకమవ్వాలని పిలుపునిచ్చారు.

హైదరాబాద్‌, జూన్‌ 2 (నమస్తే తెలంగాణ) : తెలంగాణ ఉద్యమ త్యాగాలను స్మరించుకుంటూ ప్రపంచవ్యాప్తంగా ఉన్న మన బిడ్డలను ఆవిర్భావ వేడుకలు ఒకే వేదికపైకి తీసుకొస్తున్నాయని బీఆర్‌ఎస్‌ ఎన్నారై కో ఆర్డినేటర్‌ మహేశ్‌ బిగాల పేర్కొన్నారు. ఈ మేరకు మంగళవారం ఆయన ఒక ప్రకటన విడుదల చేశారు. తెలంగాణ గౌరవాన్ని అంతర్జాతీయస్థాయిలో విస్తరించేందుకు ప్రవాసులు ఏకమవ్వాలని పిలుపునిచ్చారు. ప్రపంచ వ్యాప్తంగా ఉన్న తెలంగాణ ప్రజలకు మహేశ్‌ బిగాల శుభాకాంక్షలు తెలిపారు. తెలంగాణ తొలి సీఎం కేసీఆర్‌, బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ మార్గదర్శకత్వంలో బంగారు తెలంగాణ పునర్నిర్మాణం కోసం మళ్లీ అలుపెరుగని పోరాటం చేస్తామని బీఆర్‌ఎస్‌ స్విట్జర్లాండ్‌ నాయకుడు శ్రీధర్‌ గందె తెలిపారు.

అమరుల త్యాగాలు, కేసీఆర్‌ ఉద్యమ ఫలితమే తెలంగాణ ఏర్పాటు అని బీఆర్‌ఎస్‌ యూకే అధ్యక్షుడు నవీన్‌రెడ్డి పేర్కొన్నారు. లండన్‌లో తెలంగాణ ఆవిర్భావ దినోత్సవ వేడుకలు నిర్వహించారు. కేసీఆర్‌ ఆమరణ దీక్షతోనే తెలంగాణ సిద్ధించిందని బీఆర్‌ఎస్‌ బహ్రెయిన్‌ అధ్యక్షుడు రాధారపు సతీశ్‌ కుమార్‌ తెలిపారు. బహ్రెయిన్‌లోని అండాలస్‌ గార్డెన్‌లో ఆవిర్భావ దినోత్సవ వేడుకలను నిర్వహించారు. రాష్ట్ర ఆవిర్భావ వేడుకలు అమెరికాలోనూ జరిగాయి. వెయ్యి మంది తెలంగాణ వాదులు, బీఆర్‌ఎస్‌ ప్రతినిధులు పాల్గొన్నారు.