బోసి నవ్వుల బోధిసత్వుడు

బోసి నవ్వుల బోధిసత్వుడు పోరుబందరు పోరు బిడ్డడు

బోసి నవ్వుల బోధిసత్వుడు
పోరుబందరు పోరు బిడ్డడు
మోహమెరుగనీ మోహన్‌దాసుడు
భోగం కోరని సాధుపురుషుడు
సత్యాగ్రహ ప్రవక్త గాంధీ
స్వాతంత్య్ర ప్రదాత గాంధీ

భారతీయతే తన జీవనము
భగవద్గీతే తన భావనము
సాత్వికతే తన తాత్వికతా
సహనశీలమే సార్థకతా
॥ సత్యాగ్రహ ప్రవక్త ॥

సత్యాహింసలె శస్త్రాస్త్రాలుగ
సమరం నడిపించాడు
ఉపవాసదీక్షతో సామ్రాజ్యాన్నే
గజగజ వణికించాడు
కొల్లాయి గట్టుకొని కర్ర పట్టుకొని
జగాన్ని చుట్టొచ్చాడు
నవయుగాన్ని సృష్టించాడు
॥ సత్యాగ్రహ ప్రవక్త ॥

ఉప్పురవ్వనూ పిడికిట పట్టీ
ఉప్పెన సృష్టించాడు
వర్ణ వివక్షా, అస్పృశ్యతపై
రణమును సాగించాడు
మతఘర్షణలా మంటల నడుమ
మంచుకొండ వలె నిలిచాడు
మానవతను కాపాడాడు
తుపాకి గుండూ గుండెను చీల్చిన
హేరామంటూ ఒరిగాడు
జాతి గుండెలో నిలిచాడు
॥ సత్యాగ్రహ ప్రవక్త॥

-దేశపతి సాహితి