అరగంట డ్యాన్స్‌.. విద్యార్థిని హఠాన్మరణం

తోటి విద్యార్థులతో కలిసి ఫ్రెషర్స్‌ డేను సంతోషంగా జరుపుకొంటున్న విద్యార్థిని హఠాత్తుగా మృత్యుఒడికి చేరింది. ఈ విషాదకర ఘటన కరీంనగర్‌ జిల్లా గంగాధర మండలంలో శుక్రవారం చోటుచేసుకున్నది.

గంగాధర, ఆగస్టు 11: తోటి విద్యార్థులతో కలిసి ఫ్రెషర్స్‌ డేను సంతోషంగా జరుపుకొంటున్న విద్యార్థిని హఠాత్తుగా మృత్యుఒడికి చేరింది. ఈ విషాదకర ఘటన కరీంనగర్‌ జిల్లా గంగాధర మండలంలో శుక్రవారం చోటుచేసుకున్నది. ఉపాధ్యాయులు, స్థానికుల కథనం ప్రకారం.. గంగాధర మండలం వెంకటాయపల్లికి చెందిన గుండు ప్రదీప్తి (17) స్థానిక మోడల్‌ స్కూల్‌లో ఇంటర్‌ ప్రథమ సంవత్సరం చదువుతున్నది. శుక్రవారం పాఠశాలలో ఫ్రెషర్స్‌ డే నిర్వహించగా, తోటి విద్యార్థులతో కలిసి ఉత్సాహం గా డ్యాన్స్‌ చేస్తూ ఒక్కసారిగా స్పృహ తప్పిపడిపోయింది. గమనించిన ఉపాధ్యాయులు వెంటనే గంగాధర ప్రాథమిక ఆరోగ్య కేంద్రానికి తీసుకెళ్లారు. ప్రథమ చికిత్స అనంతరం అంబులెన్స్‌లో కరీంనగర్‌ దవాఖానకు తరలిస్తుండగా మార్గమధ్యంలో మృతి చెందింది. తమతోపాటు ఉత్సాహంగా డ్యాన్స్‌ చేసిన ప్రదీప్తి మృతి చెందడంతో తోటి విద్యార్థులు గుండెలవిసేలా రోధించారు. ఫ్రెషర్స్‌ డే అంటూ సంతోషంగా పాఠశాలకు వెళ్లిన కూతురు విగతజీవిగా తిరిగిరావడంతో తల్లిదండ్రులు, కుటుంబ సభ్యులు కన్నీరుమున్నీరుగా విలపించారు. విద్యార్థిని మృతితో గ్రామంలో విషాదఛాయలు అలుముకున్నాయి. చిన్నారి గుండెపోటుతో మృతిచెందిందా? మరే కారణంతోనా? అనేది ఇంకా తెలియరాలేదు.