Elkaturthi | శాంతినగర్ పంచాయతీకి ఒకే ఒక నామినేషన్ .. వార్డు స్థానాలు సైతం ఏకగ్రీవం

హనుమకొండ జిల్లా ఎల్కతుర్తి మండలంలోని శాంతినగర్ గ్రామ పంచాయతీ ఎన్నికలకు ఒకే ఒక నామినేషన్ దాఖలైంది.

ఎల్కతుర్తి, నవంబర్ 29 : హనుమకొండ జిల్లా ఎల్కతుర్తి మండలంలోని శాంతినగర్ గ్రామ పంచాయతీ ఎన్నికలకు ఒకే ఒక నామినేషన్ దాఖలైంది. ఈ గ్రామంలో 4 వార్డులు ఉండగా, మొత్తం 187 మంది ఓటర్లు ఉన్నారు. వీరిలో 86 మంది మహిళలు, 101 మంది పురుషులు ఉన్నారు. అయితే ప్రస్తుతం ఈ గ్రామ పంచాయతీ ఎన్నికల్లో గతంలో లాగానే జనరల్ మహిళకు కేటాయించారు. మొన్నటి వరకు సర్పంచ్‌గా పనిచేసిన బాసాని వేళాంగిణి మేరీ మాత్రమే నామినేషన్ దాఖలు చేశారు.

అలాగే గ్రామంలో ఉన్న 4 వార్డులకు కూడా ఒకే ఒక నామినేషన్లు దాఖలయ్యాయి. దీంతో ఈ గ్రామ సర్పంచ్‌ పాటు వార్డు సభ్యులు కూడా ఏకగ్రీవమయ్యారు. బీఆర్ఎస్ హయాంలో నూతన గ్రామ పంచాయతీగా ఏర్పడిన సమయంలో కూడా గ్రామంలోని వార్డు సభ్యులు, సర్పంచ్ సైతం ఏకగ్రీవం అయ్యారు. అప్పుడు, ఇప్పుడు వరుసగా సర్పంచ్ గా వేళాంగిణి మేరీ ఎన్నిక కావడం విశేషం. గ్రామస్తులంతా పోటీ లేకుండా రెండోసారి కూడా పంచాయతీ పాలకవర్గాన్ని ఏకగ్రీవంగా ఎన్నుకున్నారు.