SCR | ఆగస్టు 5 నుంచి 10 వరకు ఆ రెండు ఎక్స్‌ప్రెస్‌ల రద్దు.. ఎందుకంటే?

వచ్చే నెల 5 నుంచి 10 వరకు గోల్కొండ, శాతవాహన ఎక్స్‌ప్రెస్‌ రైళ్లను దక్షిణ మధ్య రైల్వే (SCR) రద్దుచేసింది. వీటితోపాటు సికింద్రాబాద్‌-పుణె మధ్య తిరిగే శతాబ్ది సహా పలు రైళ్లను కూడా తాత్కాలికంగా రద్దు చేస్తున్నట్లు అధికారులు వెల్లడించారు.

హైదరాబాద్‌: వచ్చే నెల 5 నుంచి 10 వరకు గోల్కొండ, శాతవాహన ఎక్స్‌ప్రెస్‌ రైళ్లను దక్షిణ మధ్య రైల్వే (SCR) రద్దుచేసింది. వీటితోపాటు సికింద్రాబాద్‌-పుణె మధ్య తిరిగే శతాబ్ది సహా పలు రైళ్లను కూడా తాత్కాలికంగా రద్దు చేస్తున్నట్లు అధికారులు వెల్లడించారు. నిర్మాణ, నిర్వహణ పనుల కారణంగా ఈ సర్వీసులను కొన్నిరోజులపాటు నిలిపివేస్తున్నట్లు తెలిపారు. సెంట్రల్‌ రైల్వే జోన్‌ పరిధిలోని దౌండ్‌ మార్గంతో పాటు దక్షిణ మధ్య రైల్వేలోని విజయవాడ డివిజన్‌లో మూడో లైను పనుల కారణంగా ప్రయాణికులకు రైళ్ల సేవల్లో అంతరాయం కలగుతుందని పేర్కొన్నారు.

ఇవీ రద్దయిన రైళ్లు..

• ఈ నెల 29, 31, ఆగస్టు 1వ తేదీల్లో పుణె-సికింద్రాబాద్‌ శతాబ్ది ఎక్స్‌ప్రెస్‌, జూలై 29, 31న సికింద్రాబాద్‌-పుణె శతాబ్ది ఎక్స్‌ప్రెస్‌ రైళ్లు రద్దయ్యాయి.
• జూలై 30, 31న సికింద్రాబాద్‌-ముంబై, ముంబై-సికింద్రాబాద్‌ ఏసీ దురంతో ఎక్స్‌ప్రెస్‌
• ఈ నెల 31న నిజామాబాద్‌-పుణె ఎక్స్‌ప్రెస్‌
• ఆగస్టు 5 నుంచి 10 వరకు విజయవాడ-భద్రాచలం రోడ్‌, భద్రాచలం రోడ్‌-విజయవాడ, డోర్నకల్‌-విజయవాడ, విజయవాడ-డోర్నకల్‌ రైళ్లు, విజయవాడ-సికింద్రాబాద్‌‌-
• విజయవాడ శాతవాహన ఎక్స్‌ప్రెస్, గుంటూరు-సికింద్రాబాద్‌‌-గుంటూరు గోల్కొండ ఎక్స్‌ప్రెస్‌లు రద్దయ్యాయి.
• హైదరాబాద్‌-షాలిమార్‌ ఈస్ట్‌కోస్ట్‌ ఎక్స్‌ప్రెస్‌తో పాటు సికింద్రాబాద్‌-విశాఖపట్నం మధ్య తిరిగే గోదావరి, సికింద్రాబాద్‌-తిరుపతి మధ్య తిరిగే పద్మావతి, సికింద్రాబాద్‌-గూడూరు మధ్య తిరిగే సింహపురి, ఆదిలాబాద్‌-తిరుపతి తిరిగే కృష్ణా ఎక్స్‌ప్రెస్‌లతోపాటు పలు రైళ్లను దారి మళ్లించారు.