‘పాలిటెక్నిక్‌’ పోరుకు దిగొచ్చిన సర్కార్‌

పాలిటెక్నిక్‌ విద్యార్థులు, అధ్యాపకుల ఆందోళనలకు ఎట్టకేలకు ప్రభుత్వం దిగొచ్చింది. పాలిటెక్నిక్‌ విద్యను శక్తిశాఖ పరిధిలో చేర్చాలనే నిర్ణయంపై వెనకి తగ్గింది. ప్రభుత్వ పాలిటెక్నిక్‌ కాలేజీలను ఇక నుంచి ఉన్నత విద్యాశాఖలోనే కొనసాగించాలని నిర్ణయించింది.

• ఉన్నత విద్యాశాఖ పరిధిలోనే ప్రభుత్వ కాలేజీలు
• యంగ్‌ ఇండియా వర్సిటీకి అకడమిక్‌ బాధ్యతలు
• తాజాగా జీవో 97కు సవరణ.. జీవో 157 జారీ

హైదరాబాద్‌, నవంబర్‌ 13 (నమస్తే తెలంగాణ) : పాలిటెక్నిక్‌ విద్యార్థులు, అధ్యాపకుల ఆందోళనలకు ఎట్టకేలకు ప్రభుత్వం దిగొచ్చింది. పాలిటెక్నిక్‌ విద్యను శక్తిశాఖ పరిధిలో చేర్చాలనే నిర్ణయంపై వెనకి తగ్గింది. ప్రభుత్వ పాలిటెక్నిక్‌ కాలేజీలను ఇక నుంచి ఉన్నత విద్యాశాఖలోనే కొనసాగించాలని నిర్ణయించింది. ఈ మేరకు గతంలో జారీచేసిన జీవో 97కు సవరణలు చేస్తూ శుక్రవారం జీవో 157ను ప్రభుత్వ ప్రధాన కార్యదర్శి సంజయ్‌ జాజు జారీచేశారు. గతంలో కార్మిక, ఉపాధి, శిక్షణ, కర్మాగారాల శాఖ పేరును డిపార్ట్‌మెంట్‌ ఆఫ్‌ సిల్‌ హ్యూమన్‌ క్యాపిటల్‌ అండ్‌ నాలెడ్జ్‌ ట్రైనింగ్‌ ఇనిషియేటివ్స్‌ (శక్తి)గా మారుస్తూ ప్రభుత్వం జీవో97 జారీచేసింది.

ఇందులో భాగంగా యంగ్‌ ఇండియా సిల్స్‌ యూనివర్సిటీ (వైఐఎస్‌యూ), అడ్వాన్స్‌డ్‌ టెక్నాలజీ సెంటర్లు, ఐటీఐలు, పాలిటెక్నిక్‌ కాలేజీలను అనుసంధానిస్తూ నిర్ణయాలు తీసుకొన్నది. దీంతో పాలిటెక్నిక్‌ కాలేజీల భవితవ్యం, అధ్యాపకుల సర్వీసు వ్యవహారాలపై విద్యార్థులు, లెక్చరర్లలో ఆందోళన నెలకొన్నది. ఈ నేపథ్యంలో పాలిటెక్నిక్‌ విద్య ఆధునీకరణ, విద్యార్థులు, ఇతర భాగస్వాముల విద్యా, వృత్తిపరమైన ప్రయోజనాల పరిరక్షణ కోసం ప్రభుత్వం ఉన్నతస్థాయి కమిటీని ఏర్పాటుచేసింది. కమిటీ సిఫార్సుల మేరకు తాజాగా మార్పులు చేసింది.

తాజా ఉత్తర్వుల ప్రకారం.. యంగ్‌ ఇండియా సిల్స్‌ యూనివర్సిటీ ఉన్నత విద్యాశాఖ పరిపాలనా నియంత్రణలో పనిచేస్తుంది. ప్రభుత్వ పాలిటెక్నిక్‌ కాలేజీలు కూడా ఉన్నత విద్యాశాఖ పరిధిలోనే కొనసాగుతాయి. మరోవైపు ఐటీఐలు, అడ్వాన్స్‌డ్‌ టెక్నాలజీ సెంటర్లు మాత్రం శక్తిశాఖ పరిధిలోనే ఉంటాయి. వీటి పాఠ్యప్రణాళికను యంగ్‌ ఇండియా వర్సిటీ నియంత్రిస్తుంది. విస్తరించనున్న విద్యా కార్యక్రమాలకు ఏఐసీటీఈ, ఇతర సమర్థ అధికార సంస్థల నుంచి అవసరమైన అనుమతులు పొందాలని యూనివర్సిటీని ప్రభుత్వం ఆదేశించింది.