మంచిర్యాలలో నిరంకుశ పాలన

‘మంచిర్యాలలో కొన్ని రోజులుగా నిరంకుశ పాలన నడుస్తున్నది. కాకా వారసులమైన మేము లాఠీ, తూటా దెబ్బలు తిని ఇక్కడికి వచ్చాం.. ఎవరికీ భయపడేది లేదు. మొదటి దెబ్బ పడితే మా మీదే పడుతుంది.

• ఎన్ని తప్పుడు కేసులు పెట్టినా అధైర్యపడొద్దు
• తూటా దెబ్బలు తినొచ్చినం.. ఎవరికీ భయపడం
• సొంతపార్టీ ఎమ్మెల్యేనుద్దేశించి కాంగ్రెస్‌ ఎంపీ గడ్డం వంశీకృష్ణ హాట్‌ కామెంట్స్‌

దండేపల్లి, నవంబర్‌13 : ‘మంచిర్యాలలో కొన్ని రోజులుగా నిరంకుశ పాలన నడుస్తున్నది. కాకా వారసులమైన మేము లాఠీ, తూటా దెబ్బలు తిని ఇక్కడికి వచ్చాం.. ఎవరికీ భయపడేది లేదు. మొదటి దెబ్బ పడితే మా మీదే పడుతుంది. కాంగ్రెస్‌ పార్టీ కార్యకర్తలకు అండగా ఉన్నామని మళ్లీ గుర్తుకు చేస్తున్నాం. తప్పుడు కేసులు పెట్టినా, తప్పుడు ప్రచారాలు చేసినా ఎవరూ అధైర్య పడకండి’ అంటూ పెద్దపెల్లి ఎంపీ వంశీకృష్ణ పరోక్షంగా ఎమ్మెల్యే వర్గీయులపై హాట్‌ కామెంట్స్‌ చేసి, తమ వర్గానికి చెందిన కార్యకర్తలకు భరోసా కల్పించారు.

మంచిర్యాల జిల్లా దండేపల్లి మండలం తాళ్లపేటలో సద్దుల బతుకమ్మ, దసరా సమయంలో ఎంపీ-ఎమ్మెల్యే వర్గీయులు పరస్పర దాడులు చేసుకున్నారు. ఈ ఘటనలో ఎంపీ వర్గానికి చెందిన పలువురిపై కేసులు నమోదు చేసి, రిమాండ్‌కు తరలించారు. ఈ నేపథ్యంలో ఎంపీ వంశీకృష్ణ, కాంగ్రెస్‌ నేత జగన్మోహన్‌రావుతో కలిసి తాళ్లపేటలో స్థానిక నేతలను పరామర్శించి, భరోసా కల్పించారు. సద్దుల బతుకమ్మ, దసరా పండుగల రోజు జరిగిన గొడవలను సర్పంచ్‌ కళావతి, ఉపసర్పంచ్‌ పుట్టపాక తిరుపతి ఎంపీకి వివరించారు. సద్దుల బతుకమ్మ రోజు ఎంపీ వర్గీయులను టార్గెట్‌ చేసి కక్షపూరిత రాజకీయాలకు పాల్పడుతున్నారని వివరించారు.