ఓ సోమన..అయ్యో పోతన

తెలంగాణ తొలి ముఖ్యమంత్రి కేసీఆర్‌ ఎంతో ప్రతిష్ఠాత్మకంగా చేపట్టిన పాలకుర్తి టూరిజం సర్క్యూట్‌కు కాంగ్రెస్‌ సర్కార్‌ మోకాలొడ్డింది. అభివృద్ధి, సంక్షేమాన్ని అస్సలు పట్టించుకోని ప్రభుత్వం.. మహనీయుల గొప్పదనాన్ని నేటితరానికి అందించే పనులపైనా నిర్లక్ష్యాన్ని ప్రదర్శిస్తున్నది. తెలంగాణ గొప్పదనాన్ని తెలియజెప్పేందుకు కేసీఆర్‌ చేపట్టిన పనుల చివరి దశను సైతం పూర్తి చేసేందుకు అడ్డంకులు కలిగిస్తున్నది.

• కవులు పోతన.. సోమనపై కాంగ్రెస్‌ సర్కార్‌ నిర్లక్ష్యం
• నిరాదరణకు గురైన చారిత్రక మహనీయుల క్షేత్రాలు
• కేసీఆర్‌ హయాంలోనే పనులు
• అధికారంలోకి వచ్చి మూడేండ్లు కావస్తున్నా పూర్తికాని చివరిదశ
• సర్కార్‌పై సాహితీవేత్తల అసంతృప్తి

హనుమకొండ, నవంబర్‌ 14 (నమస్తే తెలంగాణ ప్రతినిధి) : తెలంగాణ తొలి ముఖ్యమంత్రి కేసీఆర్‌ ఎంతో ప్రతిష్ఠాత్మకంగా చేపట్టిన పాలకుర్తి టూరిజం సర్క్యూట్‌కు కాంగ్రెస్‌ సర్కార్‌ మోకాలొడ్డింది. అభివృద్ధి, సంక్షేమాన్ని అస్సలు పట్టించుకోని ప్రభుత్వం.. మహనీయుల గొప్పదనాన్ని నేటితరానికి అందించే పనులపైనా నిర్లక్ష్యాన్ని ప్రదర్శిస్తున్నది. తెలంగాణ గొప్పదనాన్ని తెలియజెప్పేందుకు కేసీఆర్‌ చేపట్టిన పనుల చివరి దశను సైతం పూర్తి చేసేందుకు అడ్డంకులు కలిగిస్తున్నది.

మూడేండ్లు కావస్తున్నా ప్రఖ్యాత నిర్మాణాలను పూర్తి చేయడంలేదు. తొలి కవిగా ప్రసిద్ధిగాంచిన పాల్కురికి సోమనాథుడు, మహాభాగవత రచయిత బమ్మెర పోతన మాత్యుడి స్మారక నిర్మాణ ప్రాజెక్టులను ప్రభుత్వం పట్టించుకోవడంలేదు. జనగామ జిల్లా పాలకుర్తి, బమ్మెర గ్రామాలు సోమనాథుడు, పోతన సొంత ప్రాంతాలు కావడంతో ఇకడ పర్యాటకంగా అభివృద్ధి చేయాలని 2017లో బీఆర్‌ఎస్‌ ప్రభుత్వం నిర్ణయించింది. సోమనాథుడు, పోతన ఔన్నత్యాన్ని చాటిచెప్పేందుకు 2017 ఏప్రిల్‌ 28న అప్పటి ముఖ్యమంత్రి కేసీఆర్‌ పాలకుర్తికి స్వయంగా వచ్చారు. రూ.40 కోట్లతో చారిత్రక నిర్మాణ పనులకు శంకుస్థాపన చేశారు.

సోమనాథుడి స్మారక మందిరానికి రూ.10 కోట్లు, పోతన స్మారక మందిరానికి రూ.7.50 కోట్లు, వల్మిడి ఆలయ అభివృద్ధికి రూ.5 కోట్లు మంజూరు చేశారు. బమ్మెరలో పాలకుర్తి, వల్మిడి, బమ్మెర పర్యాటక అభివృద్ధి పనులు చేపట్టారు. రూ.2.5 కోట్లతో బమ్మెరలో మహాకవి పోతన 22 ఫీట్ల కాంస్య విగ్రహాన్ని రాజమహేంద్రవరం నుంచి తెప్పించి ప్రతిష్ఠించారు. బమ్మెరలో ఆడిటోరియం, పోతన స్మృతివనం, పోతన అక్షరాభ్యాసం, కళావేదిక, లక్కమాంబ చెరువు, టాయిలెట్స్‌, 22 ఫీట్ల పోతన కాంస్య విగ్రహం, పోతన సమాధి, డార్మెటరీ రూం, ఓపెన్‌ థియేటర్‌, గార్డెన్‌ పనులు ప్రారంభించారు. పాలకుర్తిలో పాల్కురికి సోమనాథుడి మెమోరియల్‌ స్టాచ్యు, శ్రీ సోమేశ్వర లక్ష్మీనర్సింహస్వామి, వల్మిడిలో రాములోరి ఆలయాల అభివృద్ధి పనులు చేపట్టగా బీఆర్‌ఎస్‌ హయాంలో వేగంగా జరిగాయి.

ఆపేసిన కాంగ్రెస్‌ సర్కార్‌..
బీఆర్‌ఎస్‌ హయాంలోనే 90 శాతం పూర్తయిన పాలకుర్తి టూరిజం సర్క్యూట్‌ పనులకు కాంగ్రెస్‌ ప్రభుత్వం అడ్డంకులు కలిగించింది. 2023లో కాంగ్రెస్‌ అధికారంలోకి వచ్చిన తర్వాత ప్రఖ్యాత ప్రాంతాల అభివృద్ధి ఆగిపోయింది. సరార్‌ నిధులు విడుదల చేయకపోవడంతో కాంట్రాక్టర్‌ చేతులెత్తేశాడు. రెండేండ్లుగా ఎక్కడి పనులు అక్కడే ఆగిపోయాయి. బీఆర్‌ఎస్‌ హయాంలో మంజూరైన నిధులను కాంగ్రెస్‌ ప్రభుత్వం విడుదల చేయకపోవడంతో బమ్మెర పర్యాటక అభివృద్ధి పనులు ముందుకు సాగడంలేదు.

పోతన సమాధి, పోతన మోటతోలిన బావి, లకమాంబ వాగు (కాలువ), విద్యుత్తు, టైల్స్‌, ప్లాస్టరింగ్‌, గార్డెన్‌ (గ్రీనరీ), ఓపెన్‌ థియేటర్‌, పారింగ్‌, ఆర్చ్‌ గేట్లు, 22 ఫీట్ల ఎత్తయిన పోతన కాంస్య విగ్రహానికి తుది మెరుగులు దిద్దడం.. ఆర్ట్స్‌, క్రాఫ్ట్‌ భవనాల పనులు ఇంకా పూర్తి చేయాల్సి ఉన్నది. పాలకుర్తితోపాటు రాష్ట్రవ్యాప్తంగా ఉన్న సాహితీవేత్తల డిమాండ్లతో గత నవంబర్‌లో పర్యాటక మంత్రి జూపల్లి కృష్ణారావు, పాలకుర్తి ఎమ్మెల్యే యశస్వినిరెడ్డి, ఉన్నతాధికారులు పరిశీలించి పనులు పూర్తి చేస్తామని ప్రకటించినప్పటికీ ఒక్క అడుగు కూడా ముందుకు పడలేదు. కాంగ్రెస్‌ ప్రభుత్వ నిర్లక్ష్యంతో ఈ ప్రాంతానికి ఉన్న ఔన్నత్యం వెలుగులోకి రాకుండాపోయే పరిస్థితి వచ్చిందని సాహితీవేత్తలు అసంతృప్తి వ్యక్తంచేస్తున్నారు.