JEE Main Results | జేఈఈ మెయిన్‌ 2023 ఫలితాలు విడుదల.. హైదరాబాద్‌ విద్యార్థికి ఫస్ట్‌ ర్యాంక్‌

దేశంలోని ప్రతిష్ఠాత్మక విద్యా సంస్థల్లో ఇంజినీరింగ్‌ కోర్సుల్లో ప్రవేశాల కోసం నిర్వహించిన జేఈఈ మెయిన్‌-2023 సెషన్‌-2 (JEE Main Session- 2) ఫలితాలు విడుదలయ్యాయి. ఈ నెల 6 నుంచి 15 వరకు జరిగిన ఈ పరీక్షల ఫలితాలను నేషనల్‌ టెస్టింగ్‌ ఏజెన్సీ (NTA) విడుదల చేసింది.

హైదరాబాద్‌: దేశంలోని ప్రతిష్ఠాత్మక విద్యా సంస్థల్లో ఇంజినీరింగ్‌ కోర్సుల్లో ప్రవేశాల కోసం నిర్వహించిన జేఈఈ మెయిన్‌-2023 సెషన్‌-2 (JEE Main Session- 2) ఫలితాలు విడుదలయ్యాయి. ఈ నెల 6 నుంచి 15 వరకు జరిగిన ఈ పరీక్షల ఫలితాలను నేషనల్‌ టెస్టింగ్‌ ఏజెన్సీ (NTA) విడుదల చేసింది. ఇందులో హైదరాబాద్‌కు చెందిన సింగారపు వెంకట్‌ కౌండిన్య 300/300 మార్కులతో మొదటి ర్యాంకు సాధించాడు. నగరానికే చెందిన సాయి దుర్గా రెడ్డి ఆరో ర్యాంక్‌ సాధించగా.. ఆంధ్రప్రదేశ్‌లోని నెల్లూరు విద్యార్థి పీ.లోహిత్‌ ఆదిత్య సాయి రెండో ర్యాంకు, అమలాపురానికి చెందిన కే.సాయినాథ్‌ శ్రీమంతకు పదో ర్యాంకు వచ్చింది.

విద్యార్థులు తమ ఫలితాలను ఎన్‌టీఏ అధికారిక వెబ్‌సైట్‌లో https://jeemain.nta.nic.in/లో చూసుకోవచ్చు. తమ అప్లికేషన్‌ నంబర్‌, పుట్టినతేదీ వివరాలను నమోదుచేసి స్కోర్‌కార్డులను డౌన్‌లోడ్‌ చేసుకోవచ్చు. జేఈఈ మెయిన్‌ సెషన్‌-1 జనవరిలో జరిగిన విషయం తెలిసిందే. ఈ పరీక్షలకు 8.60 లక్షల మంది దరఖాస్తు చేసుకోగా.. 8.24 లక్షల మంది విద్యార్థులు హాజరయ్యారు. ఏప్రిల్‌ 6 నుంచి 15 వరకు జరిగిన సెషన్‌-2 పరీక్షలకు 9.40 లక్షల మంది దరఖాస్తు చేసుకోగా (పేపర్‌-1, 2).. 9 లక్షల మంది వరకు పరీక్షకు హాజరైనట్టు సమాచారం.

ఈ నెల 30 నుంచి అడ్వాన్స్‌డ్‌ రిజిస్ట్రేషన్లు..
జేఈఈ అడ్వాన్స్‌డ్‌ పరీక్షకు ఈ నెల 30 నుంచి రిజిస్ట్రేషన్లు ప్రారంభం కానున్నాయి. మే 7 వరకు దరఖాస్తులు స్వీకరిస్తారు. మే 29 నుంచి జూన్‌ 4 వరకు అడ్మిట్‌ కార్డులను డౌన్‌లోడ్‌ చేసుకోవచ్చు. జూన్‌ 4న పరీక్ష జరుగనుంది.