రైతు ఆత్మీయ సదస్సా? ఎన్నికల సభనా?

ముఖ్యమంత్రి రేవంత్‌రెడ్డి నిర్వహించిన రైతు ఆత్మీయ సభ కాస్త రాజకీయ సభగా మారింది. సోమవారం వికారాబాద్‌ జిల్లా దుద్యాల మండలం లగచర్ల ఇండస్ట్రియల్‌ కారిడార్‌లో ఏర్పాటుచేసిన ఈ సభలో రైతుబంధుపై ఒక్క మాట కూడా మాట్లాడలేదు.

• దంచికొట్టిన రాజకీయ ప్రసంగం
• రైతుబంధుపై ఒక్క మాట లేదు
• రేవంత్‌ తీరుపై రైతుల ఆగ్రహం

మహబూబ్‌నగర్‌, నవంబర్‌ 9 (నమస్తే తెలంగాణ ప్రతినిధి) : ముఖ్యమంత్రి రేవంత్‌రెడ్డి నిర్వహించిన రైతు ఆత్మీయ సభ కాస్త రాజకీయ సభగా మారింది. సోమవారం వికారాబాద్‌ జిల్లా దుద్యాల మండలం లగచర్ల ఇండస్ట్రియల్‌ కారిడార్‌లో ఏర్పాటుచేసిన ఈ సభలో రైతుబంధుపై ఒక్క మాట కూడా మాట్లాడలేదు. అసలు ఇది రైతు సభనా లేదా రేవంత్‌రెడ్డి బర్త్‌డే ఈవెంటా? అని అనుమానం కలుగుతున్నది. ముఖ్యమంత్రి సొంత నియోజకవర్గంలో కోట్ల రూపాయల ఖర్చుతో ఏర్పాటుచేసిన రైతు మేళా, స్వయం సహాయక సంఘాల మహిళలతో సమావేశాలు, వ్యవసాయ శాస్త్రవేత్తలతో ముఖాముఖి, వ్యవసాయ రంగంలో పారిశ్రామిక విధానంపై ఎక్స్‌పో నిర్వహించి చివరకు తుస్సుమనిపించారు. రైతులకు ప్రయోజనం కలిగించే ఏ ఒక్క కార్యక్రమం పైనా హామీ ఇవ్వకపోవడంతో రైతులు తీవ్ర అసహనానికి గురయ్యారు. వర్షాభావ పరిస్థితులు ఉన్నాయని చెప్తూనే కనీసం రైతుబంధుపై ఒక్క మాట కూడా మాట్లాడలేదు.

కరువును ఎదుర్కొనేందుకు ప్రభుత్వం ఎలాంటి చర్యలు తీసుకుంటుందో చెప్పకుండానే వరి వేయొద్దు అంటూ ఆదేశించడంతో రైతులు ఆగ్రహంతో ఉన్నారు. ‘వరి పండించకపోతే ఏం తిని బతకాలి? ఆరుతడి పంటలు వేస్తే అప్పుడు కూడా కరెంటు పరిస్థితి ఇలాగే ఉంటే మేం బతికేది ఎలాగా?’ అని రైతులు ప్రశ్నిస్తున్నారు. మరోవైపు ఏడాదికి సరిపడా బియ్యం నిల్వలు ఉన్నాయని చెప్పిన ముఖ్యమంత్రి.. 3.50 కోట్ల మందికి సరిపడా బియ్యాన్ని సరఫరా చేస్తామని గొప్పలు చెప్తున్నారు. ఆ తర్వాత ఇవ్వకపోతే తమ పరిస్థితి ఏంటని రైతులు ప్రశ్నించారు. ముఖ్యమంత్రి సభ అంటేనే తిట్లు శాపనార్థాలేనా? రైతులకు ప్రయోజనం కలిగించే మాటలే లేవా? కొందరు విస్మయాన్ని వ్యక్తంచేస్తున్నారు.

ఇదిలావుండగా రాష్ట్రంలో పంటలన్నీ ఎండిపోయి రైతులు దిక్కుతోచని పరిస్థితుల్లో ఉంటే రైతు మెడ రైతు ఆత్మీయ సదస్సు అంటూ ప్రభుత్వం చేపట్టిన కార్యక్రమం ఎన్నికల ప్రచార సభగా మారిందన్న విమర్శలు వస్తున్నాయి. మరోవైపు రైతు సదస్సు మ్యూజికల్‌ ఈవెంట్‌గా నిర్వహించారన్న విమర్శలకు దారితీస్తున్నది. ఒకవైపు నల్లగొండ గద్దర్‌తో రేవంత్‌రెడ్డి సొంత డబ్బా కొట్టుకుంటూ పాడించిన పాటలు.. మరోవైపు సింగర్‌ మంగ్లీతో బతుకమ్మతోపాటు తెలంగాణ పాటలు.. ఇంకోవైపు జంగిరెడ్డితో ప్యారడైజ్‌ సినిమా పాటలు పాడించడంతో విమర్శలు వెల్లువెత్తాయి. రైతు మేళాలో రేవంత్‌ సొంత డబ్బా కొట్టుకుంటూ పాడిన పాటలు మరోవైపు ఆయా సింగర్లకు సంబంధించిన పాటలు పాటించడంతో ఈ ఆత్మీయ సదస్సు కాస్త రేవంత్‌ రెడ్డి బర్త్‌డే ఈవెంట్‌గా మారిందని జనం ముక్కున వేలేసుకున్నారు. సభ కూడా జనం లేక బోసిపోయింది. చాలావరకు ఖాళీ కుర్చీలే దర్శనమిచ్చాయి.

జనం లేక సీఎం పాదయాత్ర వెలవెల

వికారాబాద్‌ జిల్లా దుద్యాల మండలం పోలేపల్లి నుంచి లగచర్ల ఇండస్ట్రియల్‌ కారిడార్‌ వరకు ముఖ్యమంత్రి రేవంత్‌రెడ్డితోపాటు మంత్రులు చేపట్టిన పాదయాత్రలో జనం లేకపోవడంతో వెలవెలబోయింది. సొంత నియోజకవర్గంలో జనం రాకపోవడంతో ఒకింత అసహనానికి గురయ్యారు. పోలేపల్లి ఎల్లమ్మ దేవాలయంలో పూజలు నిర్వహించిన అనంతరం పాదయాత్రగా సీఎం రేవంత్‌రెడ్డి, మంత్రులు పొంగులేటి శ్రీనివాసరెడ్డి, వాకిటి శ్రీహరి, జూపల్లి కృష్ణారావు, దామోదర రాజనర్సింహతో కలిసి పాదయాత్ర చేపట్టారు ఈ పాదయాత్రలో పోలీసులు, ఇంటెలిజెన్స్‌ పోలీసులతోపాటు రోప్‌ పార్టీ పోలీసులే ఉండటం గమనార్హం.