కొడంగల్‌ క్రిటికల్‌ కేర్‌..ట్రాక్టరే అంబులెన్స్‌

శంకుస్థాపనలు, ప్రారంభోత్సవాలకు రిబ్బన్‌ కటింగ్‌లు చేస్తూ ఆర్భాటం ప్రదర్శిస్తున్న ముఖ్యమంత్రి రేవంత్‌రెడ్డి.. తన సొంత ఇలాకాలోని ప్రజలకు మాత్రం అంబులెన్స్‌ సౌకర్యం కల్పించకపోవడం తీవ్ర విమర్శలకు దారితీసింది.

• శవాన్ని తీసుకెళ్లేందుకు వాహనం అడిగితే వైద్యుల నిర్లక్ష్యపు సమాధానం
• దిక్కులేక ట్రాక్టర్‌లో తరలింపు
• రేవంత్‌ ఇలాకాలో ఘటన
• ఇటీవలే రూ.కోట్లు వెచ్చించి సీఎం రిబ్బన్‌ కటింగ్‌
• ఆర్భాటాలు కాదు.. సౌకర్యాలు కల్పించాలని డిమాండ్‌
• సీఎం రిబ్బన్‌ కట్‌ చేసిన 2 నెలలకే ఇదీ దుస్థితి!

మహబూబ్‌నగర్‌, నవంబర్‌ 11 (నమస్తే తెలంగాణ ప్రతినిధి) : శంకుస్థాపనలు, ప్రారంభోత్సవాలకు రిబ్బన్‌ కటింగ్‌లు చేస్తూ ఆర్భాటం ప్రదర్శిస్తున్న ముఖ్యమంత్రి రేవంత్‌రెడ్డి.. తన సొంత ఇలాకాలోని ప్రజలకు మాత్రం అంబులెన్స్‌ సౌకర్యం కల్పించకపోవడం తీవ్ర విమర్శలకు దారితీసింది. బుధవారం పురుగుల మందు తాగి ప్రాణాపాయ స్థితిలో ఉన్న ఓ యువకుడు పరిస్థితి విషమించి మృతిచెందగా, శవాన్ని తరలించేందుకు కొడంగల్‌ దవాఖానలో అంబులెన్స్‌ లేక గత్యంతరం లేక ట్రాక్టర్‌లో తరలించిన దయనీయ ఘటన ఇది. ఈ హృదయ విదారక సన్నివేశం జరిగింది ఎక్కడో కాదు.. కోట్లాది రూపాయలు వెచ్చింది మందీమార్బలంతో రెండు నెలల క్రితం ముఖ్యమంత్రి కొడంగల్‌లో ప్రారంభించిన 100 పడకల క్రిటికల్‌ కేర్‌ హాస్పిటల్‌లోనే. అదీగాక దవాఖానలో అరకొర వసతులు అటుంచి, ఆఖరికి శవాన్ని తరలించడానికి అంబులెన్స్‌ లేదా అని వైద్యులను అడిగితే.. ‘వెళ్లి మీ సీఎంను అడుగండి’ అంటూ నిర్లక్ష్యంగా బదులిచ్చిన తీరు తీవ్ర చర్చనీయాంశమైంది.

వివరాలిలా ఉన్నాయి.. దుద్యాల మండలం ఆలేడు గ్రామానికి చెందిన మోర రాములు (35) అనే యువకుడు కుటుంబ కలహాలతో మంగళవారం సాయంత్రం పురుగుల మందు తాగాడు. ప్రాణాపాయ స్థితిలో కొడంగల్‌ దవాఖానకు తీసుకెళ్లగా పరిస్థితి విషమించిందని పరిగికి తీసుకువెళ్లండి అంటూ వైద్యులు చెప్పడంతో హుటాహుటిన అక్కడికి తరలిస్తుండగా మార్గమధ్యంలో చనిపోయాడు. తిరిగి మంగళవారం రాత్రి మృతదేహాన్ని కొడంగల్‌ దవాఖానలోని మార్చురీలో ఉంచారు. బుధవారం పోస్టుమార్టం చేసి అప్పగించారు. అంబులెన్స్‌ గురించి అడిగితే వెళ్లి మీ సీఎంను అడుగండి అంటూ వైద్యులు దురుసుగా సమాధానమిచ్చారు. పుట్టెడు దుఃఖంతో కన్నీరుమున్నీరుగా విలపిస్తున్న కుటుంబసభ్యులు మృతదేహాన్ని తీసుకెళ్లేందుకు అంబులెన్స్‌ ఏర్పాటుచేయాలని వైద్యులను వేడుకున్నప్పటికీ ఫలితం లేకపోయింది.

ట్రాక్టర్‌లో మృతదేహం తరలింపు

దవాఖాన నుంచి మృతదేహాన్ని ఇంటికి తీసుకెళ్లడానికి కుటుంబ సభ్యులు ఒక ట్రాక్టర్‌ను మాట్లాడుకోవాల్సిన దుస్థితి ఏర్పడింది. పోస్టుమార్టం చేశాక కనీసం ట్రాక్టర్‌ వరకు కూడా దవాఖాన సిబ్బంది మృతదేహాన్ని తీసుకురాలేదని.. ట్రాక్టర్‌ను మార్చురీ వరకు తీసుకుపోవడానికి వీలు లేకపోవడంతో వైద్యశాల ఎదుటే నిలిపారు. అక్కడినుంచి బంధువులు మృతదేహాన్ని ట్రాక్టర్‌ వరకు మోసుకు రావడం కనిపించింది. ఆ తర్వాత ట్రాక్టర్‌పై వేసి గ్రామానికి తరలించి అంత్యక్రియలు చేశారు.

అంబులెన్స్‌ లేకపోవడం సిగ్గుచేటు

రేవంత్‌ సొంత నియోజకవర్గంలో మృతదేహానికి కూడా గౌరవం దక్కని పరిస్థితి దాపురించిందని కనీసం అంబులెన్స్‌ ఏర్పాటు చేయకపోవడం దారుణమని కొడంగల్‌ మండల బీఆర్‌ఎస్‌ నేత, మాజీ కౌన్సిలర్‌ మధుసూదన్‌రావు మండిపడ్డారు. కనీసం పేదల ప్రాణాలకు కూడా రక్షణ లేకుండా పోయిందని కేవలం ఆర్భాటం కోసం దవాఖాన నిర్మించారని దుయ్యబట్టారు. వేల కోట్ల అభివృద్ధి చేస్తున్నామని గొప్పలు చెప్పే కాంగ్రెస్‌ నేతలు.. సీఎం సొంత నియోజకవర్గంలో ఒక అంబులెన్స్‌ను కూడా ఏర్పాటు చేయలేని స్థితిలో ఉన్నారనేందుకు ఇదే నిదర్శనమని ధ్వజమెత్తారు. సీఎం కేవలం ప్రారంభోత్సవాలు, శంకుస్థాపనలు చేస్తున్నారని కొడంగల్‌ దవాఖానలో కనీస సౌకర్యాలు కూడా లేవని విమర్శించారు. ఇప్పటికైనా అంబులెన్స్‌ ఏర్పాటు చేసి సౌకర్యాలను కల్పించాలని డిమాండ్‌ చేశారు.