Visit:
పెద్దపల్లి, నవంబర్‌ 28(నమస్తే తెలంగాణ): సాంఘిక సంక్షేమ గురుకుల సొసైటీలో కాంట్రిబ్యూటరీ పెన్షన్‌ సీంకు సంబంధించిన సొమ్ము ఎట్టకేలకు శుక్రవారం ఉద్యోగుల సీపీఎస్‌ ఖాతాల్లో జమైంది. సాంఘిక సంక్షేమ గురుకులాల్లో పనిచేసే బోధన, బోధనేతర సిబ్బంది, ఉద్యోగుల జీతాల నుంచి మినహాయిస్తున్న సొమ్మును పది నెలలుగా ప్రభుత్వం ఇతర అవసరాలకు మళ్లించి ఉద్యోగులకు తీవ్ర అన్యాయం చేస్తున్నదంటూ ‘పది నెలలుగా జమకాని సీపీఎస్‌ సొమ్ము’ శీర్షికన శుక్రవారం ‘నమస్తే తెలంగాణ’ ప్రధాన సంచికలో ప్రచురితమైన కథనం రాష్ట్ర సాంఘిక సంక్షేమ శాఖను ఓ కుదుపు కుదిపేసింది.
శుక్రవారం మధ్యాహ్నం 12 గంటల కల్లా గురుకుల ఉద్యోగుల సీపీఎస్‌ ఖాతాల్లో సొమ్మును జమ చేశారు. డబ్బులు జమ చేసినట్టు నేరుగా ఉద్యోగులు వారి వాట్సాప్‌ గ్రూపుల్లో, వ్యక్తిగతంగా సైతం మెసేజ్‌లు పెట్టారు. 10 నెలలుగా సీపీఎస్‌ సొమ్ము ఎన్‌పీఎస్‌ ఖాతాలో జమకాకపోవడంతో దాని ద్వారా వచ్చే ఆదాయాన్ని ఉద్యోగులు కోల్పోతున్నారని, రిటైర్మెంట్‌ తర్వాత జీవితం దారుణంగా మారబోతున్నదని కథనంలో వివరించింది. ఈ విషయాన్ని కొత్త సెక్రటరీ సీరియస్‌గా తీసుకొని వెంటనే డబ్బులను జమ చేయించగా, ఉద్యోగులు సంబురపడ్డారు. ‘నమస్తే తెలంగాణ’కు వారు ప్రత్యేక
కృతజ్ఞతలు తెలిపారు.
