మహిళాశక్తి క్యాంటీన్లు బ్రాండ్‌గా ఎదగాలి

మహిళా ఉన్నతితోనే తెలంగాణ ప్రగతి సాధ్య పడుతుందని రాష్ట్ర మహిళా శిశు సంక్షేమశాఖ మంత్రి ధనసరి అనసూయ సీతక చెప్పారు. మహిళా సంఘాల మరింత బలోపేతానికే మహిళా శక్తి కార్యక్రమాలు అమలుచేస్తున్నట్టు తెలిపారు.

• సంఘాల బలోపేతానికే వడ్డీలేని రుణాలు
• కల్తీ పదార్థాలు, వస్తువులపై అధికారులు, మహిళా సంఘాలు యుద్ధం చేయాలి
• డీఆర్‌డీవోల సమీక్షలో మంత్రి సీతక

హైదరాబాద్‌, జూన్‌ 20 (నమస్తే తెలంగాణ): మహిళా ఉన్నతితోనే తెలంగాణ ప్రగతి సాధ్య పడుతుందని రాష్ట్ర మహిళా శిశు సంక్షేమశాఖ మంత్రి ధనసరి అనసూయ సీతక చెప్పారు. మహిళా సంఘాల మరింత బలోపేతానికే మహిళా శక్తి కార్యక్రమాలు అమలుచేస్తున్నట్టు తెలిపారు. మహిళా శక్తి క్యాంటీన్లు ఒక బ్రాండ్‌గా ఎదగాలని, కల్తీ వస్తువులపైన అధికారులు, మహిళా సంఘాలు యుద్ధం చేయాలని పిలుపునిచ్చారు. గురువారం రాజేంద్రనగర్‌లోని తెలంగాణ గ్రామీణాభివృద్ధి సంస్థలో జిల్లా డీఆర్డీవో, అదనపు డీఆర్డీవోలతో మహిళా శక్తి రాష్ట్రస్థాయి కార్యాచరణ ప్రణాళిక తయారీపై పంచాయతీరాజ్‌, గ్రామీణాభివృద్ధిశాఖ ముఖ్య కార్యదర్శి సందీప్‌కుమార్‌ సుల్తానియా, సంస్థ సీఈవో కాత్యాయనీతో కలిసి మంత్రి సమీక్ష నిర్వహించారు. ఈ సందర్భంగా సీతక్క మాట్లాడుతూ.. ఆధార్‌ కేంద్రాలు, మీ సేవ సెంటర్లు, పౌల్ట్రీ, డెయిరీ వ్యాపారాలు, క్యాంటీన్లు, స్టార్టప్‌ కంపెనీలు ఏర్పాటు చేసేలా మహిళా సంఘాలకు రుణ సౌకర్యం కల్పిస్తున్నట్టు చెప్పారు.

మహిళా సంఘాల ఆధ్వర్యంలో పల్లె రుచులు, ఇప్పపువ్వు లడ్డులు, నన్నారి వంటి సంప్రదాయక పానీయాలను పట్టణాలకు పరిచయం చేయాలని సూచించారు. మహిళలు ఇతరులపై ఆధారపడకుండా ఆర్థికంగా తోడ్పాటు అందించేందుకు మహిళా సంఘాలకు వడ్డీ లేని రుణాలను ప్రభుత్వమే అందజేస్తున్నదని చెప్పారు. మహిళలు అభివృద్ధి చెందిన తర్వాత ప్రభుత్వాలకే రుణాలు ఇచ్చే స్థాయికి ఎదుగుతారని తెలిపారు. ఆగస్టు 15 వరకు ప్రభుత్వ పాఠశాల విద్యార్థులకు మరో జత యూనిఫామ్‌ ఇచ్చేలా అధికారులు కార్యాచరణ సిద్ధం చేయాలని సూచించారు. సమావేశంలో పీఆర్‌ ఆర్‌డీ స్పెషల్‌ కమిషనర్‌ షఫీ ఉల్లా, ఈఎస్డీ కమిషనర్‌ రవికిరణ్‌, శ్రీనిధి ఎండీ విద్యాసాగర్‌రెడ్డి, వివిధశాఖల అధికారులు, డీఆర్డీవోలు పాల్గొన్నారు.