ఇంటర్‌ ఆధారంగా బీఈడీలో మెథడ్‌

బీఈడీ అడ్మిషన్ల విధానంలో మార్పులు
హైదరాబాద్‌, జూన్‌ 11 (నమస్తే తెలంగాణ): డిగ్రీలో కొన్ని సబ్జెక్టులు చదువకపోయినా ఆయా మెథడ్స్‌లో బీఈడీ పూర్తిచేయవచ్చు. అయితే సంబంధిత సబ్జెక్టును ఇంటర్‌లో మాత్రం కచ్చితంగా చదివి ఉండాలి. ఇందుకు అవకాశం కల్పిస్తూ ప్రభుత్వం శుక్రవారం జీవో -16ను జారీచేసింది. బీఈడీ కోర్సుల్లో ప్రవేశాల కోసం 2006లో జారీచేసిన జీవో- 92ను సవరిస్తూ, జీవో-16ను జారీచేసింది. బీఈడీ సీట్ల భర్తీ కోసం మార్గదర్శకాలను విడుదలచేసింది. ఉదాహరణకు బీసీఏ విద్యార్థులు ఇంటర్‌లో ఫిజిక్స్‌, కెమిస్ట్రీ చదివితే ఫిజికల్‌సైన్స్‌ మెథడ్‌లో చేరవచ్చు. బీబీఏ, బీసీఏ, బీబీఎం విద్యార్థులు ఇంటర్‌లో సోషల్‌సైన్సెస్‌ చదివినా బీఈడీ సోషల్‌స్టడీస్‌ మెథడ్‌లో చేరేలా మార్పులుచేసింది. కన్వీనర్‌ కోటాతోపాటు మేనేజ్‌మెంట్‌ కోటాలో సీట్లభర్తీలో ఇదే విధానాన్ని అనుసరించాలని జీవోలో పేర్కొన్నది.

మార్పులివే..

• ఫిజికల్‌సైన్స్‌ మెథడ్‌ తీసుకొనేవారు. బీఎస్సీ డిగ్రీలో ఫిజిక్స్‌ లేదా కెమిస్ట్రీ, తత్సంబంధ సబ్జెక్టులు, బీఈ, బీటెక్‌లలో ఫిజిక్స్‌, కెమిస్ట్రీ, బీసీఏ విద్యార్థులు ఇంటర్‌లో ఫిజిక్స్‌, కెమిస్ట్రీ చదివినా అర్హులే.
• జీవశాస్త్రం మెథడ్‌ తీసుకొనేవారు బీఎస్సీ, బీఎస్సీ హోంసైన్స్‌ కోర్సుల్లో బాటనీ లేదా జువాలజీ తత్సంబంధ సబ్జెక్టులు చదివి ఉండాలి. బీసీఏ విద్యార్థులు ఇంటర్‌లో జీవశాస్ర్తాన్ని చదివినా బీఈడీలో చేరవచ్చు.
• సోషల్‌ స్టడీస్‌ మెథడ్‌ తీసుకొనేవారు బీఏ, బీకాం పూర్తిచేసినవారే అర్హులు కాగా, తాజాగా బీబీఎం, బీబీఏ, బీసీఏతోపాటు ఇంటర్‌స్థాయిలో సోషల్‌సైన్సెస్‌ చదివి ఉండాలి.
• ఓరియంటల్‌ లాంగ్వేజెస్‌ మెథడ్‌ తీసుకొనేవారు. బీఏ తెలుగు, హిందీ, మరాఠి, ఉర్దూ, అరబిక్‌, సంస్కృతం, ఒక సబ్జెక్టుగా చదివి ఉండాలి. బీఏ లిటరేచర్‌లో, బీఏ (ఓరియంటల్‌ లాంగ్వేజెస్‌, ఏంఏలో పై సబ్జెక్టులో ఏ ఒక్కటి చదివినా అయా మెథడ్‌ తీసుకోవచ్చు.
• బీఏ, బీకాం, బీఎస్సీతోపాటు బీసీఏ, బీబీఎం, బీఏ, ఓరియంటల్‌ లాంగ్వేజ్‌, బీబీఏ చదివినవారు సైతం బీఈడీ కోర్సులో చేరవచ్చు.
• బీఈ, బీటెక్‌ చదివినవారు 55శాతం మార్కులతో పాస్‌ అయితేనే బీఈడీ చేసేందుకు అర్హులు కాగా, దానిని 50 శాతం మార్కులకు కుదించారు. ఇక ఎస్సీ, ఎస్టీ, బీసీ సహా ఇతర రిజర్వ్‌డ్‌ క్యాటగిరీ అభ్యర్థులు 40 శాతం మార్కులతో ఉత్తీర్ణులైతే సరిపోతుంది.