Medico Preethi case | రాష్ట్రంలో సంచలనం సృష్టించిన మెడికల్ విద్యార్థిని ప్రీతి (Medico Preethi) ఆత్మహత్యాయత్నం కేసులో ఆడియో వెలుగులోకి వచ్చింది. సీనియర్ అయిన సైఫ్ (Saif) తనతోపాటు చాలామంది జూనియర్లను వేధిస్తున్నాడని (Ragging), సీనియర్లంతా ఒక్కటిగా ఉన్నారని ఫోన్లో తన తల్లికి బాధను చెప్పుకున్నది. ఆత్మహత్యాయత్నానికి ముందురోజు ప్రీతి తన తల్లితో మాట్లాడినట్లు తెలుస్తున్నది.
సీనియర్ వేధింపులు తట్టుకోలేక వరంగల్ ఎంజీఎంలో (Warangal MGM) పీజీ విద్యార్థిని (PG Student) ప్రీతి ఆత్మహత్యాయత్నం చేసిన విషయం తెలిసిందే. ప్రస్తుతం ఆమె హైదరాబాద్లోని నిమ్స్లో (NIMS) చికిత్స పొందుతున్నది. బాధితురాలి ఆరోగ్య పరిస్థితి ఇంకా విషమంగానే ఉన్నదని వైద్యులు వెల్లడించారు. అయితే తాజాగా ఫోన్లో తన తల్లితో బాధను పంచుకున్నట్లు ఆడియో ఒకటి బయటకు వచ్చింది. సైఫ్ తనతోపాటు చాలా మంది జూనియర్లను వేధిస్తున్నాడని అందులో పేర్కొన్నది. సీనియర్లు అంతా ఒక్కటిగా ఉన్నారని ఆవేదన వ్యక్తంచేసింది.
పోలీసులతో సైఫ్కు నాన్న ఫోన్ చేయించినా లాభం లేదని, వేధింపులు రోజురోజుకు అధికమవుతున్నాయని తెలిపింది. సైఫ్పై ఫిర్యాదు చేస్తే సీనియర్లందరూ ఒక్కటై తనను దూరం పెడతారని చెప్పింది. ఏదైనా సమస్య ఉంటే తన దగ్గరికి రావాలని హెచ్వోడీ ఆగ్రహం వ్యక్తం చేశాడని వెల్లడించింది. కూతురు మాటలు విన్న తల్లి.. సైఫ్తో మాట్లాడి ఇబ్బంది లేకుండా చేస్తామని ఆమెకు ధైర్యం చెప్పే ప్రయత్నం చేసింది. అయితే మరుసటి రోజే ఆమె ఆత్మహత్యాయత్నం చేసింది.