Visit:
హైదరాబాద్, మార్చి 29(నమస్తే తెలంగాణ): శాసనసభ సమావేశాల్లో అనూహ్యంగా ఇప్పిరెడ్డి పేరు ట్రెండింగ్లోకి వచ్చింది. ఎవరీ ఇప్పి రెడ్డి అని ఆరా తీస్తే.. జడ్చర్ల ఎమ్మెల్యే అనిరుధ్రెడ్డి నూతన నామమే ఇప్పి రెడ్డి అని ఓ మంత్రి తాజాగా సర్టిఫై చేశారు. ఇటీవల అనిరుధ్రెడ్డి ఇప్ప సారాపై చర్చను తీసుకొచ్చారు. రాష్ట్రంలో మళ్లీ వినియోగంలోకి తేవాలని శాసనసభలో చర్చకు పెట్టారు. దీనిపై శాసనసభలో పెద్ద రగడ చోటుచేసుకోవడం తెలిసిందే. ‘ఇప్పసారా మంచిదే కానీ.. ఆ బ్రాండ్ తీసుకొస్తే మాత్రం ఇందిరమ్మ పేరు పెట్టకండి’ అని బీజేపీ ఎమ్మెల్యే రాకేశ్రెడ్డి అనడంతో వివాదం చెలరేగింది. దీంతో కాంగెస్, బీజేపీ సభ్యుల మధ్య దాదాపు గంటన్నర పాటు చర్చకు దారితీసింది. ఈ చర్చ ఎలా ఉన్నా అనిరుధ్రెడ్డి మాత్రం తన ప్రయత్నం ఆపడంలేదట. జర్నలిస్టులు కనిపించినా.. మంత్రులు కలిసినా.. ఇప్పసారా ముచ్చటే ముందు పెడుతున్నడట.
