టొరంటోలో లక్ష మోదకాలతో ఘనంగా వినాయక చవితి సంబరాలు..

దేశాలు దాటినా తగ్గని భక్తి, ఖండాలు దాటినా మారువని సంస్కృతి.. ఇదీ భారతీయ జీవనశైలి అనేలా ప్రవాస భారతీయులు గణపయ్యకు ఘనంగా పూజలు చేస్తున్నారు. వినాయక చవితి ప్రారంభమైనప్పటి నుంచి భక్తిశ్రద్ధలతో స్వామివారికి పూజలు నిర్వహిస్తున్నారు. కెనడాలోని టొరంటోలో ఘనంగా గణపతి హోమం నిర్వహించారు. ఈ నెల 11న లక్ష మోదక హోమంతో వినాయక చవితి సంబురాలు చేసుకున్నారు. జీఆర్డీ అయ్యర్స్ గురుకుల్ వ్యవస్థాపకుడు రమేశ్ నటరాజన్, గాయత్రి నటరాజన్ ఆధ్వర్యంలో కెనడాలోనే తొలిసారిగా హోమం నిర్వహించారు. స్థానికంగా, అమెరికా నుంచి, ఇండియా నుంచి తయారుచేసి తీసుకొచ్చిన లక్ష మోదకాలను స్వామికి సమర్పించి.. కొవిడ్ నుంచి లోకాన్ని రక్షించాలని కోరుకున్నారు. తాజాగా శుక్రవారం నుంచి రుద్రహోమం, చండీ హోమం నిర్వహిస్తున్నారు.

ప్రపంచ శక్తి దినోత్సవాన్ని పురస్కరించుకొని ఒహాయోలోని హిందూ దేవాలయం ఆఫ్ డేటన్‌లో ఈ హోమాలను నిర్వహిస్తున్నట్టు రమేశ్ నటరాజన్ తెలిపారు. అందరికీ మహా గణపతి ఆశీస్సులు అందాలని కోరుకుంటున్నట్టు ఆయన పేర్కొన్నారు.