Gadwal | గద్వాల అర్బన్, జనవరి 3 : ఓ మహిళ సెల్కు అసభ్య వీడియోలు పంపిన ఇద్దరు వ్యక్తులపై బుధవారం జోగులాంబ గద్వాల జిల్లా కేంద్రంలో కేసు నమోదైంది. బాధితురాలు తెలిపిన వివరాల ప్రకారం.. జిల్లా కేంద్రానికి చెందిన అనిల్ అతడి స్నేహితుడు వద్ద ఉన్న బైక్ను నెలన్నర కిందట తీసుకొని వెళ్తుండగా రోడ్డు ప్రమాదానికి గురై మృతి చెందాడు. తర్వాత బైక్ను సంఘటన స్థలం నుంచి అనిల్ స్నేహితులు నవీన్, వేణు తీసుకెళ్లారు. ఈ విషయం తెలుసుకొన్న యజమాని తన బైక్ ఇవ్వాలని పదే పదే కోరగా.. తమ వద్ద లేదని బుకాయించారు.
ఎన్నిసార్లు వారికి ఫోన్ చేసినా లిఫ్ట్ చేయలేదు. చివరకు తన భార్య మొబైల్ నుంచి ఫోన్ చేసేవాడు. భర్త ఇంట్లో లేని సమయంలో సదరు వ్యక్తులు ఆమెతో ఫోన్లో అసభ్యంగా మాట్లాడటంతోపాటు ఆశ్లీల వీడియోలు పంపుతూ వేధింపులకు గురిచేశారు. ఈ విషయాన్ని సదరు మహిళ స్థానిక పోలీస్స్టేషన్లో ఫిర్యాదు చేసినా స్పందించకపోవడంతో బుధవారం ఎస్పీ రితిరాజ్ను ఆశ్రయించారు. ఈ మేరకు ఇద్దరిపై కేసు నమోదు చేసినట్టు గద్వాల టౌన్ ఎస్సై శ్రీకాంత్ తెలిపారు. కేసును ఉపసంహరించుకోవాలని కాంగ్రెస్ నాయకులు ఒత్తిడి చేస్తున్నట్టు బాధిత మహిళ ఆవేదన వ్యక్తం చేశారు.